ആലപ്പുഴ: പൊളിറ്റിക്കല് ക്രിമിനലുകള്ക്കെതിരെ ശക്തമായ നിലപാട് സ്വീകരിച്ച മുതിര്ന്ന നേതാവും മുന് മന്ത്രിയുമായ ജി. സുധാകരനെ അസഭ്യം പറഞ്ഞ് അടിച്ചിരുത്താന് സിപിഎമ്മിലെ ഒരു വിഭാഗം ആസൂത്രിത നീക്കം നടത്തുന്നു. സുധാകരന്റെ ഫെയ്സ്സ്ബുക്ക് പോസ്റ്റുകള്ക്ക് താഴെ ഒരു വിഭാഗം സിപിഎം പ്രവര്ത്തകര് സംഘടിതമായെത്തി അസഭ്യം പറയുന്നത് പതിവായിരിക്കുകയാണ്. പാര്ട്ടി നേതൃത്വത്തിനോട് പരാതി പറഞ്ഞെങ്കിലും നടപടിയില്ല.
രേഖാമൂലം പോലീസില് പരാതി നല്കിയ കേസുകളിലും നടപടി സ്വീകരിക്കുന്നില്ല. സിപിഎമ്മിലെ പ്രബല വിഭാഗം ഇത്തരക്കാരെ സംരക്ഷിക്കാന് രംഗത്തെത്തുന്നതിനാല് പോലീസും നിസഹായരാണ്. ഇതില് ഒടുവിലത്തേതാണ് സിപിഎം പ്രാദേശിക നേതാവ് ഫെയ്സ്ബുക്ക് കമന്റിലൂടെ സുധാകരനെ അസഭ്യം പറഞ്ഞത്. സുധാകരന് അമ്പലപ്പുഴ സ്റ്റേഷനിലെത്തി പരാതി നല്കിയതോടെ കേസെടുക്കാന് പോലീസ് നിര്ബന്ധിതമായി.
അമ്പലപ്പുഴ കിഴക്ക് ലോക്കല് കമ്മിറ്റി അംഗം യു. മിഥുനെതിരെയാണ് കേസ്. രമേശ് ചെന്നിത്തലയുടെ നേതൃത്വത്തില് നടത്തിയ ലഹരിവിരുദ്ധ കൂട്ടനടത്തത്തെ അഭിനന്ദിച്ച് സുധാകരന് സമൂഹമാധ്യമത്തില് എഴുതിയ കുറിപ്പിനു താഴെ എഴുതിയ കമന്റിലാണ് മിഥുന് അശ്ലീല പരാമര്ശം നടത്തിയത്. അമ്പലപ്പുഴ ശ്രീകൃഷ്ണ സ്വാമി ക്ഷേത്രത്തിലെ താത്കാലിക ജീവനക്കാരനായ മിഥുന് ക്ഷേത്ര ഭരണ ചട്ടങ്ങളുടെ ലംഘനം നടത്തിയതായും പോലീസിനു നല്കിയ പരാതിയില് സുധാകരന് പറഞ്ഞു.
