തൃശ്ശൂര്‍: തൃശ്ശൂര്‍ ലോക്‌സഭാ മണ്ഡലത്തിലെ സുരേഷ് ഗോപിയുടെ വിജയത്തെച്ചൊല്ലി എല്‍ഡിഎഫും യുഡിഎഫും നടത്തുന്നത് വ്യാജ പ്രചരണങ്ങള്‍. വോട്ടര്‍ പട്ടികയില്‍ തിരുകിക്കയറ്റി എന്ന വാദത്തില്‍ കഴമ്പില്ല.
തെരഞ്ഞെടുപ്പ് ദിവസം തന്നെ വരണാധികാരിയായിരുന്ന ജില്ലാ കളക്ടര്‍ വി.ആര്‍. കൃഷ്ണതേജ ഈ പരാതി പരിശോധിച്ചതാണ്. തുടര്‍ന്ന് വോട്ടര്‍പട്ടികയില്‍ പേരുള്ളവര്‍ വോട്ട് ചെയ്യട്ടെ എന്നും ഇക്കാര്യത്തില്‍ തര്‍ക്കമുള്ളവര്‍ക്ക് കോടതിയെ സമീപിക്കാം എന്നും അദ്ദേഹം നിര്‍ദേശിച്ചിരുന്നു.
എല്‍ഡിഎഫോ യുഡിഎഫോ ഒരു വര്‍ഷം പിന്നിട്ടിട്ടും കോടതിയില്‍ പോവുകയോ തെളിവുകള്‍ ഹാജരാക്കുകയോ ചെയ്തിട്ടില്ല. ഏതെങ്കിലും ഒന്നോ രണ്ടോ വീട്ടു നമ്പറുകളില്‍ തെറ്റായ പേരുകള്‍ കയറിക്കൂടുന്നത് വോട്ടര്‍പട്ടിക തയാറാക്കുമ്പോള്‍ ഉണ്ടാകുന്ന സ്വാഭാവികമായ പിശകുകള്‍ മാത്രമാണ്.
സുരേഷ് ഗോപിയുടെ വിജയം 74,686 വോട്ടുകള്‍ക്കാണ്. തൃശ്ശൂര്‍ നഗരത്തില്‍ മാത്രമല്ല ലോക്‌സഭാ മണ്ഡലത്തിലെ
ഏഴില്‍ ആറ് അസംബ്ലി മണ്ഡലങ്ങളിലും സുരേഷ് ഗോപി വ്യക്തമായ ലീഡ് നേടിയിരുന്നു. പുതുക്കാട്, ഒല്ലൂര്‍, ഇരിഞ്ഞാലക്കുട, നാട്ടിക, മണലൂര്‍, തൃശ്ശൂര്‍ നിയമസഭാ മണ്ഡലങ്ങളില്‍ സുരേഷ് ഗോപിക്ക് മറ്റ് രണ്ട് മുന്നണികളേക്കാള്‍ വ്യക്തമായ ഭൂരിപക്ഷം ഉണ്ടായിരുന്നു. ഗുരുവായൂര്‍ മണ്ഡലത്തില്‍ മാത്രമാണ് സുരേഷ് ഗോപി ലീഡ് നേടാതിരുന്നത്.
തൃശൂര്‍ നഗരത്തില്‍ വ്യാജ വോട്ടുകള്‍ ചേര്‍ത്തത് കൊണ്ട് മാത്രം ആറ് അസംബ്ലി മണ്ഡലത്തിലും വ്യക്തമായ ലീഡ് നേടുന്നത് എങ്ങനെയെന്ന് ആരോപണമുന്നയിക്കുന്നവര്‍ വ്യക്തമാക്കുന്നില്ല.
2019 ലെ ലോക്‌സഭാ തെരഞ്ഞെടുപ്പില്‍ ലഭിച്ചതിനേക്കാള്‍ ഒരു ലക്ഷത്തിലേറെ വോട്ടുകളാണ് കോണ്‍ഗ്രസിന് മണ്ഡലത്തില്‍ കുറഞ്ഞത്. ബിജെപി വ്യാജ വോട്ടുകള്‍ ചേര്‍ത്താല്‍ കോണ്‍ഗ്രസിന് എങ്ങനെ വോട്ട് കുറയും എന്ന കാര്യം യുഡിഎഫ് നേതാക്കള്‍ തന്നെ വ്യക്തമാക്കണം. മാത്രമല്ല 2019 നെ അപേക്ഷിച്ച് 2024ല്‍ വോട്ടിങ് ശതമാനം കുറയുകയാണ് ചെയ്തത്. 2019 ല്‍ 77.94 ശതമാനമായിരുന്നു പോളിങ്. 2024 ല്‍ 73.63% മാത്രമാണ്. ഇതില്‍ വി.എസ്. സുനില്‍കുമാറിന് 0.1 ശതമാനം വോട്ട് മാത്രമാണ് 2019 നെ അപേക്ഷിച്ചു വര്‍ധിച്ചത്. 2014 സി. എന്‍ ജയദേവന്‍ ഇടതുമുന്നണി സ്ഥാനാര്‍ത്ഥിയായി മത്സരിക്കുമ്പോള്‍ കിട്ടിയ വോട്ട് 3,89029 ആണ്.
സുനില്‍കുമാറിന് കഴിഞ്ഞവര്‍ഷം ലഭിച്ചതാകട്ടെ 337652. ഇതിനര്‍ത്ഥം എല്‍ഡിഎഫിന്റെ വോട്ടുകള്‍ വന്‍തോതില്‍ നഷ്ടമായി എന്നാണ്. 2021 ലെ നിയമസഭാ തെരഞ്ഞെടുപ്പില്‍ എല്‍ഡിഎഫിന് കിട്ടിയ വോട്ടിനേക്കാള്‍ ഒരു ലക്ഷം വോട്ട് കുറവാണ് സുനില്‍കുമാറിന് 2024 ല്‍ ലഭിച്ചത്. സുനില്‍കുമാറിന്റെ സ്വന്തം ബൂത്തിലും പഞ്ചായത്തിലും ഇടതിന് വോട്ടു കുറഞ്ഞു. ആധികാരികമായ ഇത്തരം വസ്തുതകളെല്ലാം നിലനില്‍ക്കുമ്പോഴാണ് അടിസ്ഥാനരഹിതമായ ആരോപണമുന്നയിച്ച് സുരേഷ് ഗോപിയുടെ വിജയത്തിന്റെ മാറ്റ് കുറയ്‌ക്കാന്‍ ശ്രമിക്കുന്നത്.
ആദ്യം തൃശ്ശൂര്‍ പൂരം അലങ്കോലമാക്കിയാണ് സുരേഷ് ഗോപി വിജയിച്ചത് എന്നായിരുന്നു പ്രചരണം. പോലീസ് അന്വേഷണത്തില്‍ ആ വ്യാജ പ്രചരണത്തിന്റെ മുനയൊടിഞ്ഞു. പോലീസും സംസ്ഥാന മന്ത്രിമാരും പ്രതിക്കൂട്ടിലായി. പ്രതിസന്ധി ഉണ്ടായപ്പോള്‍ പൂരം നടത്താനാണ് സുരേഷ് ഗോപി ഇടപെട്ടതെന്നും ചുമതലപ്പെട്ട പോലീസ് ഉന്നതരും മന്ത്രിമാരും ആ സമയത്ത് ഉറക്കത്തിലായിരുന്നു എന്നും വ്യക്തമായി. തുടര്‍ന്നാണ് വോട്ടര്‍ പട്ടികയിലെ ക്രമക്കേടുമായി വീണ്ടും രംഗത്ത് വരുന്നത്.
ജന്മഭൂമി ഓണ്‍ലൈന്‍