ന്യൂദല്ഹി : പാലിയേക്കര ടോള് പിരിവ് നാലാഴ്ചത്തേത്ത് നിര്ത്താനുളള ഹൈക്കോടതി ഉത്തരവിന് എതിരെ ദേശീയപാത അതോറിറ്റി സുപ്രീംകോടതിയില് അപ്പീല് നല്കി. ഇടക്കാല ഉത്തരവ് റദ്ദാക്കണമെന്നാവശ്യപ്പെട്ടാണ് അപ്പീല്.
അടിപ്പാതാ നിര്മാണത്തെ തുടര്ന്ന് മണ്ണുത്തി ഇടപ്പള്ളി ദേശീയപാതയില് രൂപപ്പെട്ട മണിക്കൂറുകള് നീളുന്ന ഗതാഗതക്കുരുക്കിലാണ് ടോള് പിരിവ് നിര്ത്തി വയ്ക്കാന് ഹൈക്കോടതി ഉത്തരവിട്ടത്. ഉത്തരവ് അടിയന്തരമായി നടപ്പാക്കുമെന്ന് ടോള് പ്ലാസ അധികൃതര് പറഞ്ഞിരുന്നു. ഹൈക്കോടതിവിധി ജനങ്ങളുടെ വിജയമെന്ന് ഹര്ജിക്കാരന് ഷാജി കോടന്കണ്ടത്തും പ്രതികരിച്ചു. ഹൈക്കോടതി ഉത്തരവിനെതിരെ സുപ്രീംകോടതിയില് അപ്പീല്സാധ്യത മുന്നില് കണ്ട് ഷാജി കോടങ്കണ്ടത് തടസഹര്ജി ഫയല് ചെയ്തിരുന്നു.
പുതുക്കാട്, പേരാമ്പ്ര, മുരിങ്ങൂര്, കൊരട്ടി, ചിറങ്ങര തുടങ്ങി അഞ്ചു ഇടങ്ങളില് അടിപാത നിര്മ്മാണത്തെ തുടര്ന്ന് മണിക്കൂറുകള് നീളുന്ന ഗതാഗതക്കുരുക്കാണ് യാത്രക്കാര് നേരിടുന്നത്. പലതവണ ഹൈക്കോടതി ഉള്പ്പെടെ പ്രശ്നത്തില് ഇടപെട്ടിട്ടും പ്രശ്നം പരിഹരിക്കപ്പെട്ടില്ല. തുടര്ന്നാണ് നാലാഴ്ച ടോള് പിരിവ് തന്നെ നിര്ത്തിവയ്ക്കാനുള്ള ഉത്തരവ് വന്നത്..
ടോള് നിര്ത്തിവെച്ചെങ്കിലും പാലിയേക്കര ടോള് പിരിവ് കമ്പനിക്ക് ദേശീയപാത അതോറിറ്റി നഷ്ടപരിഹാരം നല്കണമെന്ന വ്യവസ്ഥയുണ്ട്. കരാര് പ്രകാരം ടോള് പിരിവ് നിര്ത്തി വയ്ക്കേണ്ടി വന്നാല് ദേശീയപാത അതോറിറ്റി അതിനു സമാനമായ തുക നല്കണം എന്നുള്ളതാണ് വ്യവസ്ഥ.
