മാവേലിക്കര: ചെട്ടികുളങ്ങര ദേവിക്ഷേത്രത്തിലെ അടുത്ത ഒരുവര്ഷത്തെ പുറപ്പെടാ മേല്ശാന്തിയായി മറ്റം വടക്ക് കല്ലംമ്പള്ളി ഇല്ലത്ത് അജി നാരായണന് നമ്പൂതിരി (39)യെ നറുക്കെടുപ്പിലൂടെ തെരഞ്ഞെടുത്തു. നിലവില് ചെന്നിത്തല കാരാഴ്മ ഉലച്ചിക്കാട് ശ്രീകൃഷ്ണ സ്വാമി ക്ഷേത്രത്തിലെ മേല്ശാന്തിയാണ്. 2021 മുതല് 2024 വരെ ചെട്ടികുളങ്ങര ദേവിക്ഷേത്രത്തിലെ കീഴ്ശാന്തിയായിരുന്നു. കല്ലമ്പള്ളി ഇല്ലത്ത് ഇ. നാരായണന് നമ്പൂതിരിയുടെയും സരസ്വതിദേവിയുടെയും മകനാണ്.
ഇന്നലെ ഉച്ചപൂജയ്ക്കു ശേഷം പന്ത്രണ്ടേമുക്കാലോടെയായിരുന്നു നറുക്കെടുപ്പ്. അഞ്ചുപേരായിരുന്നു പട്ടികയിലുണ്ടായിരുന്നത്. അമ്മ ശ്രുതിയോടൊപ്പം ക്ഷേത്രദര്ശനത്തിനെത്തിയ ചവറ മേനാമ്പള്ളി പഠിപ്പുര വീട്ടില് ആദിത്യ രാജീവ് (5) ആണ് നറുക്കെടുത്തത്. നാലാമതായി അജി നാരായണന് നമ്പൂതിരിയുടെ പേരും മേല്ശാന്തി എന്ന പേപ്പറും നറുക്കെടുക്കുകയായിരുന്നു.
തൃക്കാരിയൂര് ദേവീക്ഷേത്രം, പാവുമ്പ മഹാദേവക്ഷേത്രം, വെട്ടിക്കുളങ്ങര ദേവീക്ഷേത്രം, വെള്ളിക്കുളങ്ങര ദേവീക്ഷേത്രം, എരുവ ശ്രീകൃഷ്ണസ്വാമി ക്ഷേത്രം, കീര്ത്തിപുരം ശ്രീകൃഷ്ണസ്വാമി ക്ഷേത്രം എന്നിവിടങ്ങളില് മുന്പ് ശാന്തിയായിരുന്നു. ഹരിപ്പാട് പെരുമ്പ ഇല്ലം ആര്യാദേവി .എ ആണ് ഭാര്യ. പത്തിച്ചിറ സെന്റ് ജോണ്സ് ഏഴാം ക്ലാസ് വിദ്യാര്ത്ഥി അഗ്നിവേശ് .എ, അഞ്ചാം ക്ലാസ് വിദ്യാര്ത്ഥി അഗ്നിദേവ് .എ എന്നിവരാണ് മക്കള്.
ചിങ്ങം ഒന്നിന് അജി നാരായണന് നമ്പൂതിരിയെ മേല്ശാന്തിയായി അവരോധിക്കും. തുടര്ന്ന് 15 ദിവസം ക്ഷേത്രത്തില് ഭജനമിരുന്ന ശേഷം സപ്തംബര് ഒന്നുമുതല് ചുമതല നിര്വഹിക്കും.
