തിരുവനന്തപുരം : നടനും ബിജെപി നേതാവുമായ കൃഷ്ണകുമാറിന്റെ മകള്‍ ദിയ കൃഷ്ണയുടെ സ്ഥാപനത്തിലെ സാമ്പത്തിക തട്ടിപ്പില്‍ ക്രൈംബ്രാഞ്ചിനോട് കുറ്റം സമ്മതിച്ച് പ്രതികളായ മുന്‍ ജീവനക്കാരികള്‍.തെളിവെടുപ്പിനിടെ ‘ഓ ബൈ ഓസി’ എന്ന സ്ഥാപനത്തിലെ മുന്‍ ജീവനക്കാരികള്‍ തട്ടിപ്പ് രീതി ക്രൈംബ്രാഞ്ചിനോട് വിവരിച്ചു. മെഷീന്‍ ഉപയോഗിച്ചുള്ള ക്യു ആര്‍ കോഡ് കൃത്രിമം പുനരാവിഷ്‌കരിച്ചു.വിനീത, രാധകുമാരി എന്നിവരുമായാണ് തെളിവെടുപ്പ് നടത്തിയത്.
സ്ഥാപനത്തില്‍ നിന്നും സാധനങ്ങള്‍ വാങ്ങുമ്പോള്‍ നല്‍കുന്ന ബില്ലില്‍ കസ്റ്റമറുടെ പേരും ഫോണ്‍ നമ്പറും വയ്‌ക്കാറില്ല. ആഭരണങ്ങളുടെ വില നിശ്ചയിക്കുന്നത് ദിയയാണ്. കസ്റ്റമര്‍ തെരഞ്ഞെടുക്കുന്ന ആഭരണത്തിന്റെ ചിത്രം ദിയയ്‌ക്ക് അയക്കുമ്പോള്‍ വില നിശ്ചയിച്ച് ദിയ മറുപടി നല്‍കുമെന്നും ജീവനക്കാരികള്‍ പറയുന്നു. യഥാര്‍ത്ഥ വില അറിയുന്നതിനുള്ള ബാര്‍കോഡ് ബില്ലില്‍ ഉള്‍പ്പെടുത്തില്ലെന്നും മുന്‍ ജീവനക്കാരികള്‍ ക്രൈംബ്രാഞ്ചിനെ അറിയിച്ചു.
ആഭരണം വാങ്ങിയ ജ്വല്ലറി, ദിയയുടെ കവടിയാറിലെ ഫ്‌ലാറ്റ്, സ്ഥാപനം എന്നിവിടങ്ങളിലാണ് തെളിവെടുപ്പ് നടത്തിയത്.
അതേസമയം, മുന്‍ ജീവനക്കാര്‍ സ്ഥാപനത്തില്‍ നിന്ന് 69 ലക്ഷം രൂപ തട്ടിച്ചുവന്നാണ് അന്വേഷണത്തില്‍ കണ്ടെത്തിയിരിക്കുന്നത്.ഇതില്‍ 40 ലക്ഷം തട്ടിച്ചതിന്റെ രേഖ ലഭിച്ചിട്ടുണ്ട്.തട്ടിയ പണം മൂന്ന് പേരും പങ്കിട്ടെടുക്കുകയായിരുന്നു.ഈ പണം ഉപയോഗിച്ച് വാങ്ങിയ സ്‌കൂട്ടര്‍ ക്രൈംബ്രാഞ്ച് പിടിച്ചെടുത്തു. തട്ടിപ്പ് പണം ഉപയോഗിച്ച് വാങ്ങിയ സ്വര്‍ണം പല സ്ഥാപനങ്ങളിലായി പണയം വച്ചിട്ടുളളതും കണ്ടുകെട്ടും.
അതേസമയം, മൂന്നാം പ്രതി ദിവ്യയ്‌ക്കായുള്ള അന്വേഷണം ഊര്‍ജിതമായി നടക്കുകയാണ്.
