ന്യൂദല്ഹി: യെമന് ജയിലില് വധശിക്ഷയ്ക്ക് വിധിക്കപ്പെട്ട് കഴിയുന്ന നിമിഷപ്രിയയുടെ മോചനത്തിനായി വീണ്ടും ഇടപെടണമെന്ന് അഭ്യര്ത്ഥിച്ച് ഗവര്ണര് രാജേന്ദ്ര വിശ്വനാഥ് ആര്ലേക്കറെ കണ്ട് ചാണ്ടി ഉമ്മന് എംഎല്എ.പ്രവാസി വ്യവസായി സാജന് ലത്തീഫും ഒപ്പമുണ്ടായിരുന്നു. നേരത്തെയും ചാണ്ടി ഉമ്മന് ഗവര്ണറെ കണ്ടിരുന്നു. തുടര്ന്ന് ഗവര്ണര് കേന്ദ്രസര്ക്കാരുമായി സംസാരിച്ച് ആവശ്യമായ നീക്കങ്ങള് നടത്തിയിരുന്നു.
അതിനിടെ,നിമിഷപ്രിയയുടെ വധശിക്ഷയ്ക്ക് പുതിയ തീയതി നിശ്ചയിക്കണമെന്ന് ആവശ്യപ്പെട്ട് കൊല്ലപ്പെട്ട തലാലിന്റെ സഹോദരന് അബ്ദുല് ഫത്താഹ് മെഹ്ദി ഇട്ട ഫേസ്ബുക്ക് പോസ്റ്റ് മനുഷ്യാവകാശ പ്രവര്ത്തകന് സാമുവല് ജെറോം ഷെയര് ചെയ്തു.യമനില് നിമിഷ പ്രിയയുടെ മോചനത്തിനായി പ്രവര്ത്തിക്കുന്ന ആളാണ് സാമുവല് ജെറോം.
വധശിക്ഷയ്ക്ക് പുതിയ തിയതി നിശ്ചയിക്കണം എന്നാണ് അബ്ദുല് ഫത്താഹ് മെഹ്ദിയുടെ ആവശ്യം. വധശിക്ഷ നീട്ടിവെച്ചിട്ട് 15 ദിവസം പിന്നിട്ടെന്നും പുതിയ തിയതി ഇതുവരെ നിശ്ചയിച്ചിട്ടില്ലെന്നുമാണ് അബ്ദുല് ഫത്താഹ് മെഹ്ദി പ്രോസിക്യൂട്ടര്ക്ക് നല്കിയ കത്തിലെ ഓര്മ്മപ്പെടുത്തല്. മധ്യസ്ഥ ശ്രമങ്ങള്ക്കോ ചര്ച്ചകള്ക്കോ ഉള്ള എല്ലാ ശ്രമങ്ങളെയും തള്ളുന്നുവെന്നും കത്തില് പറയുന്നു.
