ചോറ്റാനിക്കര: ചോറ്റാനിക്കര ദേവീക്ഷേത്രത്തിലെ ചിങ്ങം ഒന്നു മുതല് ഒരു വര്ഷത്തെ മേല്ശാന്തിമാരായി നമ്പ്യാങ്കാവ് ക്ഷേത്രത്തിലെ എന്.വി.കൃഷ്ണന് നമ്പൂതിരിയേയും (തൃശൂര് നന്തിക്കര നടുവത്ത്മന, നെല്ലായി), പുതിയേടം ശ്രീകൃഷ്ണ ക്ഷേത്രത്തിലെ സി.എല്. സതീഷ് നമ്പൂതിരി (എറണാകുളം കാഞ്ഞൂര് പുതിയേടം ചേലപ്പാറമ്പ് മന) യേയും നറുക്കെടുപ്പിലൂടെ തെരഞ്ഞെടുത്തു. ഓരോ മാസങ്ങള് ഇടവിട്ട് ഇവര് മേല്ശാന്തിമാരായി സേവനമനുഷ്ഠിക്കും.
12 ദിവസത്തെ ഭജനത്തിനു ശേഷമായിരിക്കും മേല്ശാന്തിമാരായി അവരോധിക്കുന്നത്. കിഴുക്കാവ് ക്ഷേത്രത്തില് കുന്നത്തക്കോവ് എന്.വി. കൃഷ്ണദാസ്, ശിവക്ഷേത്രത്തില് നെട്ടൂര് ശിവക്ഷേത്രത്തിലെ കെ.വിജയരാജ്, ശാസ്താ ക്ഷേത്രത്തില് എറണാകുളം ശിവക്ഷേത്രത്തിലെ എ.എസ്. പ്രവീണ് എന്നിവര് ഓരോ മാസങ്ങളില് മാറി മാറി ശാന്തിക്കാരായിപ്രവര്ത്തിക്കും.
രാവിലെ പന്തീരടി പൂജയ്ക്കുശേഷം ക്ഷേത്രംതന്ത്രി പൂജിച്ച വെള്ളി കലശത്തിലെ നറുക്കുകള് കൊടിമരച്ചുവട്ടില് വച്ചതിനുശേഷം താഴിമറ്റത്ത് സാനുവിന്റെ ആറു വയസുകാരി മീനാക്ഷിയാണ് നറുക്കെടുത്തത്. കൊച്ചിന് ദേവസ്വം ബോര്ഡ് അംഗം അഡ്വ കെ.പി. അജയന്, അസി. കമ്മിഷണര് ബിജു ആര്. പിള്ള, മാനേജര് രഞ്ജിനി രാധാകൃഷ്ണന്, പി.എന്. ഹരികുമാര്, സിജു. കെ.കെ, വി.വി. അനിരുദ്ധന് (വിജിലന്സ്), പള്ളിപ്പുറത്ത് നാരായണന് നമ്പൂതിരിപ്പാട് (ഊരാളന്), സമിതി പ്രസിഡന്റ് പ്രവീണ് ബാലകൃഷ്ണന്, സെക്രട്ടറി ഗിരീഷ് ബാബു നിരവധി ഭക്ത ജനങ്ങള് എന്നിവരുടെ സാന്നിദ്ധ്യത്തിലാണ് നറുക്കെടുപ്പു നടന്നത്. കൊച്ചിന് ദേവസ്വം ബോര്ഡിലെ ക്ഷേതങ്ങളില്നിന്ന് ശാന്തിക്കാരെ പ്രത്യേകം തന്ത്രിമാരുടെ നേതൃത്വത്തില് സ്ക്രീനിങ് നടത്തിയതിനു ശേഷമാണ് നറുക്കുകളില് ഉള്പ്പെടുത്തിയത്.
