ന്യൂദല്‍ഹി: സ്വാതന്ത്ര്യത്തോടൊപ്പം രാജ്യത്തിന്റെ വിഭജനത്തിന്റെ വേദനയും ചേര്‍ന്നിട്ടുണ്ടെന്ന് പ്രധാനമന്ത്രി നരേന്ദ്രമോദി. ആഗസ്ത് പതിനാല് വിഭജന ഭീകരത സ്മരണദിനമായി ആചരിക്കുമെന്നും പ്രധാനമന്ത്രി പറഞ്ഞു. മന്‍ കി ബാത്തില്‍ സംസാരിക്കുകയായിരുന്നു അദ്ദേഹം.
സ്വാതന്ത്ര്യസമരസേനാനി ഖുദിറാം ബോസിനെ അനുസ്മരിച്ചുകൊണ്ടാണ് പ്രധാനമന്ത്രി ആഗസ്ത് മാസത്തിലെ പ്രധാനപ്പെട്ട ദിവസങ്ങളെക്കുറിച്ച് പരാമര്‍ശിച്ചത്. രാജ്യത്തിന്റെ വീരന്മാര്‍ തങ്ങളുടെ രക്തംകൊണ്ട് സ്വാതന്ത്ര്യ പ്രസ്ഥാനങ്ങളെ നനച്ചു വളര്‍ത്തി. ആഗസ്ത് മാസം അതുകൊണ്ടാണ് വിപ്ലവത്തിന്റെ മാസമാകുന്നത്. ആഗസ്ത് ഒന്നാം തീയതി ലോകമാന്യ ബാല ഗംഗാധരതിലകിന്റെ പുണ്യതിഥിയാണ്. ആഗസ്ത് എട്ടിനാണ് ഗാന്ധിജിയുടെ നേതൃത്വത്തില്‍ ‘ക്വിറ്റ് ഇന്ത്യ പ്രസ്ഥാനം ആരംഭിച്ചത്. ആഗസ്ത് പതിനഞ്ചിനാണ് സ്വാതന്ത്ര്യ ദിനം.
1905 ആഗസ്ത് ഏഴിനാണ് സ്വദേശി പ്രസ്ഥാനം ആരംഭിച്ചത്. ഈ സ്മരണയില്‍ രാജ്യം എല്ലാ വര്‍ഷവും ആഗസ്ത് ഏഴിന് നാഷണല്‍ ഹാന്‍ഡ്ലൂം ഡേ ആഘോഷിക്കുന്നു. ഈ ആഗസ്ത് ഏഴിന് നാഷണല്‍ ഹാന്‍ഡ്ലൂം ഡേയുടെ പത്ത് വര്‍ഷം പൂര്‍ത്തിയാവുന്നു. ഖാദി എങ്ങനെയാണോ സ്വാതന്ത്ര്യ സമരത്തിന് പുതിയ ശക്തി നല്‍കിയത്, അതുപോലെ ഇന്ന് രാജ്യം, വികസിത ഭാരതമാകാന്‍ മുന്നോട്ട് പോകുമ്പോള്‍, ടെക്സ്‌റ്റൈല്‍ സെക്ടര്‍ രാജ്യത്തിന്റെ ശക്തിയായി മാറുകയാണ്. 2047ല്‍ വികസിത ഭാരതത്തിലേക്കുള്ള വഴി സ്വാശ്രയത്വമാണ്. ആത്മനിര്‍ഭര്‍ ഭാരതം എന്നതിന്റെ ഏറ്റവും വലിയ അടിത്തറ വോക്കല്‍ ഫോര്‍ ലോക്കലാണ്.
ഭാരതത്തില്‍ നിര്‍മിച്ച ഏതൊരു ഉല്‍പ്പന്നവുമാകട്ടെ, അത് ഉണ്ടാക്കാന്‍ ഒരു ഭാരതീയന്റെ വിയര്‍പ്പ് വീണിട്ടുണ്ടെങ്കില്‍, അത് തന്നെ വാങ്ങുക, അത് തന്നെ വില്‍ക്കുക. ഇത് നമ്മുടെ ദൃഢനിശ്ചയമായിരിക്കണം, പ്രധാനമന്ത്രി ഓര്‍മ്മപ്പെടുത്തി. നാഗപഞ്ചമി, രക്ഷാബന്ധന്‍, ജന്മാഷ്ടമി ആശംസകളും പ്രധാനമന്ത്രി നേര്‍ന്നു.
