ന്യൂദല്ഹി : ഇന്ത്യ-യുകെ വ്യാപാര കരാര് യഥാര്ത്ഥ്യമായി. പ്രധാനമന്ത്രി നരേന്ദ്രമോദിയും യുകെ പ്രധാനമന്ത്രി കെയര് സ്റ്റാര്മറും നടത്തിയ ചര്ച്ചയ്ക്ക് ശേഷമാണ് കരാര് ഒപ്പുവെച്ചത്.
കരാര് പ്രകാരം ഇന്ത്യയിലെ സമുദ്രോത്പന്നങ്ങള്, കാപ്പി, തേയില എന്നിവയ്ക്ക് തീരുവ ഉണ്ടാകില്ല.സുഗന്ധ വ്യഞ്ജനം, ടെക്സ്റ്റൈല്സ്, ചെരുപ്പ്, എന്നിവയ്ക്കും തീരുവ കാണില്ല. കയറ്റുമതി രംഗത്ത് പ്രോത്സാഹനം നല്കുന്നതാണ് വ്യാപാരക്കരാര്.
യുകെ ഉത്പന്നങ്ങളുടെ ഇന്ത്യയിലെ തീരുവ മൂന്ന് ശതമാനമായി കുറയും. ക്ഷീരോത്പന്നങ്ങള്, ആപ്പിള് തുടങ്ങിയവയ്ക്ക് ഇന്ത്യ തീരുവ ഇളവ് നല്കില്ലെന്നും കേന്ദ്ര സര്ക്കാര് അറിയിച്ചു.
ഇന്ത്യയില് നിന്നുളള കാര്ഷിക ഉത്പന്നങ്ങള്ക്കുള്പ്പെടെ യുകെയിലെ വിപണി തുറന്നു നല്കുന്നതാണ് പുതിയ സ്വതന്ത്ര വ്യാപാര കരാര്. യുകെയില് നിന്നുള്ള ചില കാര്ഷിക ഉത്പന്നങ്ങള്ക്കും വാഹനങ്ങള്ക്കും ഇന്ത്യന് വിപണിയും ഈ കരാറിലൂടെ തുറന്നു കിട്ടും. ഇന്ത്യയില് നിന്നുള്ള സമുദ്രോത്പന്നങ്ങള്ക്ക് യുകെയില് 20 ശതമാനം തീരുവ ഉണ്ടായിരുന്നത് പൂജ്യമാക്കി. ഇന്ത്യന് ചെമ്മീനും തീരുവയില്ലാതെ യുകെ ഇറക്കുമതി ചെയ്യും.
സുഗന്ധവ്യഞ്ജനങ്ങള്, കശുവണ്ടി തുടങ്ങിയവയുടെ തീരുവ കുറച്ചു. തേയില, കാപ്പി എന്നിവയുടെ ഇറക്കുമതി നിയന്ത്രണം യുകെ ഒഴിവാക്കും.
പാക്കറ്റ് ഭക്ഷണത്തിന് എഴുപത് ശതമാനം വരെ തീരുവ ഉണ്ടായിരുന്നതും യുകെ ഒഴിവാക്കും. ഇന്ത്യന് തുണിത്തരങ്ങള്ക്ക് 12 ശതമാനവും രാസവസ്തുക്കള്ക്ക് 8 ശതമാനവും തീരുവ യുകെ ചുമത്തിയിരുന്നത് പിന്വലിച്ചു. ഇന്ത്യയില് നിന്നുള്ള സോഫ്റ്റ്വയറിനുള്ള തീരുവയും കുറച്ചു. സ്മാര്ട്ട് ഫോണുകള്, എഞ്ചിനീയറിംഗ് ഉത്പനങ്ങള്, പാവകള്, സ്പോര്ട്ട്സ് ഉപകരണങ്ങള്, രത്നങ്ങള്, ആഭരണങ്ങള്, പ്ളാസ്റ്റിക്, മരുന്നുകള്, മെഡിക്കല് ഉപകരണങ്ങള് എന്നിവയ്ക്കുള്ള തീരുവയും യുകെ എടുത്തുകളയും.
ഇന്ത്യന് ജീവനക്കാരെ നിയമിക്കുന്ന സ്ഥാപനങ്ങള് സാമൂഹ്യസുരക്ഷ നിധി അടയ്ക്കുന്നതിലും ഇളവുണ്ടാകും. യുകെ ഉത്പന്നങ്ങള്ക്ക് ഇന്ത്യയിലുണ്ടായിരുന്ന ശരാശരി 15 ശതമാനം തീരുവ മൂന്ന് ശതമാനമായി കുറയ്ക്കും. വാഹനങ്ങള്, സ്കോച്ച് വിസ്കി എന്നിവയുടെ തീരുവ കുറയും.
അതേ സമയം ക്ഷീരോത്പന്നങ്ങള്, ഭക്ഷ്യ എണ്ണ, ആപ്പിള് തുടങ്ങവയ്ക്കുള്ള സംരക്ഷണം തുടരും എന്നാണ് കേന്ദ്ര സര്ക്കാര് വ്യക്തമാക്കിയത്.
