കൊച്ചി: സ്‌കൂള്‍ ഒരു മാസത്തിലേറെയായി വെള്ളത്തിലാണെന്ന് ചൂണ്ടിക്കാട്ടി കൈനകരി എസ്എന്‍ഡിപി ഹയര്‍ സെക്കന്‍ഡറി സ്‌കൂളിലെ 200 ഓളം വിദ്യാര്‍ത്ഥികള്‍ ചീഫ് ജസ്റ്റിസിന് അയച്ച കത്ത് ഹര്‍ജിയായി സ്വീകരിച്ചു. വിഷയത്തില്‍ ബന്ധപ്പെട്ട ഉദ്യോഗസ്ഥരുടെ സംയുക്ത യോഗം വിളിച്ച് പ്രശ്‌നപരിഹാരത്തിനു നടപടി സ്വീകരിക്കാന്‍ കോടതി ജില്ലാ കളക്ടര്‍ക്ക് നിര്‍ദ്ദേശം നല്‍കി. സ്വീകരിച്ച നടപടി അടുത്ത വ്യാഴാഴ്ച കോടതിക്ക് റിപ്പോര്‍ട്ട് ചെയ്യണം.
മെയ് 29 ന് കനത്ത മഴയെത്തുടര്‍ന്ന് ചിറ തകര്‍ന്ന് 20 ക്ലാസ് മുറികള്‍ ജനല്‍പ്പടി വരെ വെള്ളത്തിനടിയിലാണ്. ലൈബ്രറി, കമ്പ്യൂട്ടര്‍ ലാബ് എന്നിവിടങ്ങളിലാണ് ക്ലാസുകള്‍ നടക്കുന്നത്. നിരവധി പരാതികള്‍ നല്‍കിയിട്ടും ഫലമുണ്ടായില്ലെന്ന് വിദ്യാര്‍ത്ഥികള്‍ പറഞ്ഞു. ചീഫ് ജസ്റ്റിസ് നിതിന്‍ ജാംദാര്‍ , ജസ്റ്റിസ് ബസന്ത് ബാലാജി എന്നിവരടങ്ങിയ ബെഞ്ചാണ് കേസ് പരിഗണിക്കുന്നത്. ഈ പ്രദേശത്ത് സമാനമായ പ്രശ്നമുള്ള മറ്റ് സ്‌കൂളുകള്‍ ഉണ്ടോ എന്ന് പരിശോധിക്കാന്‍ കളക്ടറോട് ആവശ്യപ്പെടുകയും ചെയ്തിട്ടുണ്ട്. ജില്ലാ ലീഗല്‍ സര്‍വീസസ് അതോറിറ്റി വസ്തുതാപരമായ അന്വേഷണം നടത്തി അമിക്കസ് ക്യൂറിയെ വിലയിരുത്തി ശരിയായ ഫോര്‍മാറ്റിലുള്ള ഹര്‍ജി ഫയല്‍ ചെയ്യാനും കോടതി നിര്‍ദ്ദേശിച്ചിട്ടുണ്ട്.
