ന്യൂദല്‍ഹി: സമാജത്തില്‍ ഭിന്നതകള്‍ സൃഷ്ടിക്കാനുള്ള ഗൂഢാലോചനകളെ ഇല്ലാതാക്കാന്‍ ഹിന്ദു സംഘടിക്കുകയും ഒന്നാവുകയും വേണമെന്ന് വിശ്വഹിന്ദു പരിഷത്ത് കേന്ദ്രീയ പ്രബന്ധ സമിതി പ്രമേയം. മനുഷ്യ ക്ഷേമത്തിനായുള്ള പുണ്യപ്രവൃത്തികളില്‍ ഹിന്ദു സമൂഹം നിരന്തരം ഏര്‍പ്പെട്ടിരിക്കുകയാണ്. എന്നാല്‍ നിരവധി ദുഷ്ട ശക്തികള്‍ ഹിന്ദുക്കളെ ഭിന്നിപ്പിക്കാന്‍ ശ്രമിക്കുന്നു.
ജാതി, ഭാഷ, പ്രദേശം, ലിംഗഭേദം, ആരാധനാരീതി, പാരമ്പര്യം, ആചാരങ്ങള്‍, പെരുമാറ്റം എന്നിവയുടെ പേരില്‍ ഐക്യം ഇല്ലാതാക്കാന്‍ ശ്രമങ്ങള്‍ നടക്കുന്നു. ഹിന്ദുക്കളെ ഹിന്ദുക്കള്‍ക്കെതിരെ അണിനിരത്തുന്നു. ജാതി മുന്‍വിധിയുടെ അടിസ്ഥാനത്തില്‍ സമൂഹത്തെ വിഭജിക്കാനും പരസ്പരം അവിശ്വാസം സൃഷ്ടിക്കാനുമുള്ള ഗൂഢാലോചനകളും ആസൂത്രിതമായ മതപരിവര്‍ത്തന നീക്കങ്ങളും നടക്കുന്നു.
ഹിന്ദു ചിഹ്നങ്ങള്‍, ആരാധ്യരായ സന്യാസിമാര്‍, പാരമ്പര്യങ്ങള്‍, ഉത്സവങ്ങള്‍ എന്നിവയില്‍ അവിശ്വാസം സൃഷ്ടിക്കല്‍, ഹിന്ദു തനിമ ഇല്ലാതാക്കാനുള്ള ശ്രമങ്ങള്‍, യുവാക്കളുടെയും സ്ത്രീകളുടെയും മനസില്‍ പാരമ്പര്യത്തോട് അപകര്‍ഷതാബോധം സൃഷ്ടിക്കല്‍, എന്നിവയാണ് ഈ ഗൂഢശക്തികളുടെ ലക്ഷ്യങ്ങളെന്ന് പ്രമേയം ചൂണ്ടിക്കാട്ടി.
വിദേശ ഫണ്ടുള്ള പുരോഗമന വാദ, മതപരിവര്‍ത്തന ശക്തികള്‍, ഭാരത വിരുദ്ധ ആഗോള സംഘങ്ങള്‍ എന്നിവ ഈ ഗൂഢാലോചനയില്‍ സജീവമാണ്. ഹിന്ദു സമൂഹത്തെ തകര്‍ക്കുകയും ഭാരതത്തിന്റെ വേരുകളെ ആക്രമിക്കുകയും ചെയ്യുക എന്നതാണ് അവരുടെ ആത്യന്തിക ലക്ഷ്യം.
ഈ ഗൂഢാലോചനകള്‍ക്കിടയിലും ഹിന്ദു ഉണര്‍വ് പ്രകടമാണെന്ന് പ്രബന്ധ സമിതി അഭിപ്രായപ്പെട്ടു. രാജ്യത്തിന്റെ എല്ലാ കോണുകളില്‍ നിന്നുമുള്ള ഹിന്ദു സമൂഹം അതിന്റെ ധര്‍മ്മത്തിലേക്കും പാരമ്പര്യത്തിലേക്കും സംസ്‌കാരത്തിലേക്കും മടങ്ങുകയാണ്. മഹാ കുംഭമേള, കന്‍വാര്‍ യാത്ര, ശ്രീ അമര്‍നാഥ് യാത്ര, ശ്രീരാമ ജന്മഭൂമിയിലെ മഹാക്ഷേത്ര നിര്‍മ്മാണം, ഗോസംരക്ഷണ പ്രസ്ഥാനങ്ങള്‍, വിവിധ ധാര്‍മ്മികപരിപാടികള്‍, തീര്‍ത്ഥാടനങ്ങള്‍, ക്ഷേത്രങ്ങള്‍ എന്നിവ ഹിന്ദു സമൂഹത്തിന്റെ വിരാട രൂപം വെളിപ്പെടുത്തുന്നു. ദേശീയ, ഹിന്ദു ജീവിത മൂല്യങ്ങളുമായി ബന്ധപ്പെട്ട സാഹിത്യം, കല, സംഗീതം മുതലായവയോടുള്ള വര്‍ദ്ധിച്ചുവരുന്ന ആകര്‍ഷണം, ഹിന്ദു വീരനായകരോടുള്ള വര്‍ദ്ധിച്ചുവരുന്ന ആദരവ് എന്നിവയെല്ലാം ഹിന്ദു ഉണര്‍വിന്റെ ലക്ഷണങ്ങളാണെന്ന് പ്രമേയം ചൂണ്ടിക്കാട്ടി.
വിഭജന ശക്തികളെ തിരിച്ചറിയാന്‍ സമൂഹം തയാറാവണം.ഭിന്നതകള്‍ പൂര്‍ണമായും ഇല്ലാതാക്കണം. സര്‍ക്കാരുകള്‍ പാഠ്യപദ്ധതിയില്‍ ധാര്‍മ്മിക വിദ്യാഭ്യാസം ഉള്‍പ്പെടുത്തണം. ഓരോ ഹിന്ദുവും സംഘടിച്ച് സാമൂഹിക വിരുദ്ധ ശക്തികളെ ഫലപ്രദമായി ചെറുക്കണമെന്ന് പ്രമേയം ആഹ്വാനം ചെയ്തു.
