ബീഹാറിലെ 42 ലക്ഷത്തോളം വോട്ടര്‍മാര്‍ വിലാസത്തിലില്ല, കണ്ടെത്താന്‍ തെരഞ്ഞെടുപ്പു കമ്മിഷന്‌റെ തീവ്രശ്രമം

പട്‌ന:ബീഹാറിലെ 42 ലക്ഷത്തോളം വോട്ടര്‍മാരെ അവരുടെ വിലാസങ്ങളില്‍ കണ്ടെത്തിയിട്ടില്ലെന്നും 7.50 ലക്ഷത്തിലധികം പേര്‍ ഒന്നിലധികം സ്ഥലങ്ങളില്‍ പേര് ചേര്‍ത്തിട്ടുണ്ടെന്നും തിരഞ്ഞെടുപ്പ് കമ്മീഷന്‍. സംസ്ഥാനത്തെ വോട്ടര്‍ പട്ടികയുടെ പരിഷ്‌കരണത്തില്‍, ഏകദേശം 7.90 കോടി വോട്ടര്‍മാരില്‍ 95.92 ശതമാനം പേരുടേയും കാര്യത്തില്‍ വ്യക്തത വരുത്തി.
ഓഗസ്റ്റില്‍ പ്രസിദ്ധീകരിക്കുന്ന കരട് വോട്ടര്‍ പട്ടികയില്‍ നിന്ന് യോഗ്യരായ ഒരു വോട്ടറെയും ഒഴിവാക്കുന്നില്ലെന്ന് ഉറപ്പാക്കാന്‍ ബൂത്ത് ലെവല്‍ ഓഫീസര്‍മാരെയും രാഷ്‌ട്രീയ പാര്‍ട്ടികളുടെ ബൂത്ത് ലെവല്‍ ഏജന്റുമാരെയും ഉപയോഗിച്ച് ഓരോ വോട്ടറെയും സമീപിക്കാന്‍ ശ്രമങ്ങള്‍ നടത്തുന്നുണ്ടെന്ന് തിരഞ്ഞെടുപ്പ് കമ്മീഷന്‍ അറിയിച്ചു.ബൂത്ത് ലെവല്‍ ഓഫീസര്‍മാര്‍ ഇതിനകം മൂന്ന് റൗണ്ടിലധികം വീടുതോറുമുള്ള സന്ദര്‍ശനങ്ങള്‍ പൂര്‍ത്തിയാക്കി. ശേഷിക്കുന്ന വോട്ടര്‍മാരുടെ വിവരശേഖരണത്തിന് മുഴുവന്‍ തിരഞ്ഞെടുപ്പ് സംവിധാനവും സംയുക്ത ശ്രമം ആരംഭിച്ചിട്ടുണ്ട്.