തിരുവനന്തപുരം: പേരൂര്‍ക്കടയില്‍ ദളിത് സ്ത്രീ ജോലിക്ക് നിന്ന വീട്ടില്‍ നിന്ന് മാല മോഷണം നടത്തി എന്ന കേസില്‍ പ്രതികള്‍ക്ക് മുന്‍കൂര്‍ ജാമ്യം.വ്യാജ പരാതി നല്‍കിയ ഒന്നാം പ്രതി വീട്ടുടമയായ ഓമന ഡാനിയല്‍ മൂന്നാം പ്രതി എസ് ഐ പ്രസാദ് എന്നിവര്‍ക്കാണ് ജാമ്യം.
തിരുവനന്തപുരം എസ് സി-എസ് ടി കോടതിയാണ് ജാമ്യം അനുവദിച്ചത്.പ്രതികളെ അറസ്റ്റ് ചെയ്യാത്തതിനെതിരെ ബിന്ദുവും കുടുംബവും നിലപാടെടുത്തിരുന്നു. ഇതിനിടെയാണ് പ്രതികള്‍ക്ക് ജാമ്യം കിട്ടിയത്.
എസ്.ഐയും,എ.എസ്.ഐയും ചേര്‍ന്നു ബിന്ദുവിനെ അന്യായമായി തടഞ്ഞുവെച്ചുവെന്നും കേസ് രജിസ്റ്റര്‍ ചെയ്തത് അന്വേഷണം നടത്താതെയെന്നും എഫ്‌ഐആറില്‍ പറയുന്നുണ്ട്. വീട്ടുജോലിക്കാരി ബിന്ദു മാല മോഷ്ടിച്ചെന്നാണ് ഓമന ഡാനിയല്‍ പരാതി നല്‍കിയത്. മാല നഷ്ടപ്പെട്ടത് ഏപ്രില്‍ 18നാണെങ്കിലും പരാതി 23നാണ് നല്‍കിയത്.
ബിന്ദുവിന്റെ വീട്ടില്‍ അറിയിക്കാതെ ഒരു രാത്രി മുഴുവന്‍ പൊലീസ് സ്റ്റേഷനില്‍ ഇരുത്തി ബിന്ദുവിനെ ക്രൂരമായി ചോദ്യം ചെയ്തു.എന്നാല്‍ പിന്നീട് മാല വീട്ടില്‍ നിന്ന് തന്നെ കണ്ടെത്തിയെന്ന് ഓമന ഡാനിയേല്‍ അറിയിച്ചു. ഇതോടെയാണ് പൊലീസ് സ്റ്റേഷനില്‍ ദളിത് സ്ത്രീ നേരിട്ട ദുരനുഭവം പുറത്തറിയുന്നത്.തിരുവനന്തപുരം ജില്ല ക്രൈംബ്രാഞ്ചാണ് കേസില്‍ അന്വേഷണം നടത്തുന്നത്.
