കൊല്ലം: തേവലക്കര ബോയ്‌സ് സ്‌കൂളില്‍ വൈദ്യുതാഘാതമേറ്റുളള മിഥുന്റെ മരണം സംബന്ധിച്ച് വിവാദ പരാമര്‍ശം നടത്തിയതില്‍ ഖേദം പ്രകടിപ്പിച്ച് മന്ത്രി ചിഞ്ചുറാണി.തനിക്ക് വീഴ്ച പറ്റിയെന്ന് മന്ത്രി സമ്മതിച്ചു.
പരാമര്‍ശം വേണ്ടിയിരുന്നില്ല. അങ്ങനെ പറയരുതായിരുന്നുവെന്നും പെട്ടെന്ന് പറഞ്ഞപ്പോള്‍ വാക്കുകള്‍ മാറിപ്പോയതാണെന്നും ചിഞ്ചുറാണി മാധ്യമങ്ങളോട് പ്രതികരിച്ചു.
മരിച്ച മിഥുന്റെ വീട്ടിലെത്തി കുടുംബാംഗങ്ങളെയും മന്ത്രി ആശ്വസിപ്പിച്ചു. മന്ത്രിയുടെ അനുചിതമായ വാക്കുകളില്‍ പാര്‍ട്ടിക്കുള്ളിലും അമര്‍ഷം പുകഞ്ഞതോടെയാണ് ചിഞ്ചുറാണിയുടെ ഖേദപ്രകടനം.
മിഥുന്റെ മരണത്തെ കുറിച്ച് ലഘൂകരിച്ച് സംസാരിച്ച മന്ത്രി അധ്യാപകരെ കുറ്റപ്പെടുത്താന്‍ ആവില്ലെന്നാണ് ഇന്നലെ പറഞ്ഞത്.കുട്ടി വലിഞ്ഞുകയറിയതിനാലാണ് അപകടം ഉണ്ടായതെന്നായിരുന്നു ചിഞ്ചുറാണിയുടെ പരാമര്‍ശം.ഭരണ പ്രതിപക്ഷ വ്യത്യാസമില്ലാതെ വിമര്‍ശനമുയര്‍ന്നതോടെയാണ് മന്ത്രി മിഥുന്റെ കുടുംബത്തെ കാണാനെത്തിയത്. മന്ത്രിയുടെ വാക്കുകള്‍ പാര്‍ട്ടിക്ക് അവമതിപ്പ് ഉണ്ടാക്കിയെന്ന വികാരം പാര്‍ട്ടിയില്‍ ശക്തമാണ്. ഇതു തണുപ്പിക്കാന്‍ കൂടിയാണ് വെളളിയാഴ്ച തന്നെ മന്ത്രി മിഥുന്റെ വീട്ടിലെത്തിയത്.
