കോട്ടയം: വീട്ടില്‍ വില്പനയ്ക്കായി സൂക്ഷിച്ചിരുന്ന കഞ്ചാവുമായി സ്ത്രീ ഉള്‍പ്പെടെ 3 പ്രതികള്‍ പിടിയില്‍. കാരാപ്പുഴ പയ്യമ്പിള്ളിച്ചിറയില്‍ ഈശ്വരി (47), കാരാപ്പുഴ പൂത്തറ വീട്ടില്‍ അഖില്‍ പി.രാജ് (27), കാഞ്ഞിരം ചുങ്കത്ത് വീട്ടില്‍ അക്ഷയ് സി. അജി (26) എന്നിവരെയാണ് കോട്ടയം വെസ്റ്റ് പോലീസ് അറസ്റ്റ് ചെയ്തത്. കോട്ടയം ജില്ലാ പോലീസ് മേധാവിക്ക് ലഭിച്ച രഹസ്യ വിവരത്തെ തുടര്‍ന്ന് ജില്ലാ ലഹരി വിരുദ്ധ സ്‌ക്വാഡും കോട്ടയം വെസ്റ്റ് പോലീസും സംയുക്തമായി നടത്തിയ പരിശോധനയിലാണ് കോട്ടയം പയ്യമ്പളിച്ചിറ ഭാഗത്തെ ഈശ്വരിയുടെ വീട്ടില്‍ നിന്ന് സിപ്പ് ലോക്ക് കവറുകളിലാക്കി സൂക്ഷിച്ചിരുന്ന 1.713 കിലോഗ്രാം കഞ്ചാവ് കണ്ടെത്തിയത്.
അഖില്‍, അക്ഷയ് എന്നിവര്‍ എംഡിഎംഎ ഉള്‍പ്പെടെയുള്ള ലഹരികേസുകളില്‍ പ്രതികളാണ്. ഒന്നാംപ്രതി ഈശ്വരിയുടെ മകന്‍ സുന്ദര്‍ ഗണേഷ് കോട്ടയം വെസ്റ്റ് പോലീസ് കാപ്പ നിയമപ്രകാരം ജില്ലയില്‍ നിന്നും നാടുകടത്തിയിരിക്കുകയാണ്. ഇയാള്‍ക്കെതിരെ തിരുപ്പൂരില്‍ 8 കിലോ കഞ്ചാവുമായി പിടിക്കപ്പെട്ട കേസും നിലവിലുണ്ട്.
