കോട്ടയം: മീനച്ചിലാറ്റില് നിന്ന് നീര്നായയുടെ കടിയേറ്റ വീട്ടമ്മ ചികില്സയ്ക്കുശേഷം കുഴഞ്ഞുവീണു മരിച്ചു. വേളൂര് പാണംപടി കലയം കേരില് ഇബ്രാഹിംകുട്ടിയുടെ ഭാര്യ നിസാനി (53) ആണു മരിച്ചത്. ഹൃദയാഘാതമാകാം മരണകാരണമെന്ന് കരുതുന്നു. പോസ്റ്റു മോര്ട്ടം റിപ്പോര്ട്ടു ലഭിച്ചാലേ വ്യക്തമായ കാരണം അറിയാന് കഴിയൂ. മീനച്ചിലാറ്റില് വീടിനോട് ചേര്ന്ന് കടവില് തുണി കഴുകുമ്പോഴായിരുന്നു നിസാനിയെ നീര്നായ കടിച്ചത്. രക്തം വാര്ന്നതിനെത്തുടര്ന്ന് ജനറല് ആശുപത്രിയിലെത്തിയ നിസാനിയെ കുത്തിവെപ്പു നല്കിയശേഷം മൂന്ന് മണിക്കൂര് കഴിഞ്ഞ് വീട്ടില് പറഞ്ഞു വിട്ടിരുന്നു. വീട്ടിലെത്തിയ കുറച്ചു കഴിഞ്ഞ് ഇവര് കുഴഞ്ഞുവീഴുകയായിരുന്നു. മെഡിക്കല് കോളജ് ആശുപത്രിയിലെത്തിച്ചെങ്കിലും ഫലമുണ്ടായില്ല. മകള്: ജാസ്മിന്. മരുമകന്: മുബാറക്.
