ഇന്ത്യയിലെ ഏറ്റവും വലിയ എണ്ണവിതരണ-എണ്ണസംസ്കരണ കമ്പനിയാകാന്‍ മുകേഷ് അംബാനിയുടെ റിലയന്‍സ്

മുംബൈ: ഇന്ത്യയിലെ ഏറ്റവും വലിയ എണ്ണവിതരണ-എണ്ണസംസ്കരണ രംഗത്ത് ഒന്നാമനാകാന്‍ മുകേഷ് അംബാനിയുടെ റിലയന്‍സ് രംഗത്ത്. ഇതിനായി ഇന്ത്യയിലെ ഇപ്പോള്‍ 6750 പെട്രോള്‍ ബങ്കുകളും ഏകദേശം 20 മില്യണ്‍ ടണ്‍ എണ്ണ സംസ്കരിക്കാന്‍ ശേഷിയുള്ള റിഫൈനറിയും ഉള്ള നയാര എന്ന കമ്പനിയെ ഏറ്റെടുക്കാനുള്ള ശ്രമത്തിലാണ് മുകേഷ് അംബാനി. ഏകദേശം 1.72 ലക്ഷം കോടി രൂപ വിപണി മൂല്യമുള്ള നയാരയുടെ അന്തിമ വിലയായി പറയുന്നത് 1.46 ലക്ഷം കോടി രൂപയാണ്. എന്നാല്‍ ഇതിനേക്കാള്‍ കുറഞ്ഞ വിലയ്‌ക്കാണ് നയാരയെ ഏറ്റെടുക്കാന്‍ അംബാനി ശ്രമിക്കുന്നത് എന്നതിനാല്‍ ഇതുവരെ തീരുമാനമായിട്ടില്ല.

റഷ്യന്‍ കമ്പനിയായ റോസ് നെഫ്റ്റ് എന്ന ഓയില്‍ ഭീമനായ റോസ് നെഫ്റ്റിന്റെ കൈവശമുള്ള നയാരയുടെ 49.13 ശതമാനം ഓഹരികളാണ് മുകേഷ് അംബാനി സ്വന്തമാക്കാന്‍ ശ്രമിക്കുന്നത്. ബാക്കി വരുന്ന 50.87 ശതമാനം ഓഹരികള്‍ കയ്യടക്കിവെച്ചിരിക്കുന്ന യുസിപി ഇന്‍വെസ്റ്റ് മെന്‍റ് ഗ്രൂപ്പ്, ട്രഫിഗര എന്നീ കമ്പനികളില്‍ നിന്നു കൂടി നയാരയുടെ ഓഹരി മുകേഷ് അംബാനി സ്വന്തമാക്കുമെന്നറിയുന്നു.

ഇപ്പോള്‍ ഏറ്റവും വലിയ എണ്ണ സംസ്കരണശേഷിയുള്ള കമ്പനി പൊതുമേഖലാകമ്പനിയായ ഇന്ത്യന്‍ ഓയില്‍ കോര്‍പറേഷനാണ്. 80.8 മില്യണ്‍ ടണ്‍ ആണ് ഇവരുടെ എണ്ണ സംസ്കരണ ശേഷി. ഇപ്പോള്‍ റിലയന്‍സിന്റെ ജാം നഗര്‍ പ്ലാന്‍റിന് 68.2 മില്യണ്‍ ടണ്‍ എണ്ണ സംസ്കരണശേഷി ഉണ്ട്. നയാരയ്‌ക്കാകട്ടെ 20 മില്യണ്‍ ടണ്ണോളം എണ്ണ സംസ്കരിക്കാനുള്ള ശേഷിയുമുണ്ട്. ഇത് രണ്ടും ചേരുമ്പോള്‍ റിലയന്‍സിന്റെ സംസ്കരണ ശേഷി 88.2 മില്യണ്‍ ടണ്‍ ആകുന്നതോടെ റിലയന്‍സാകും ഇന്ത്യയിലെ ഏറ്റവും വലിയ എണ്ണ സംസ്കരണ കമ്പനി.

അതുപോലെ നയാരയ്‌ക്ക് 6750 പമ്പുകളും റിലയന്‍സിന് 1972 പമ്പുകളും ഇന്ത്യയില്‍ ഉണ്ട്. ഇത് രണ്ടും ചേരുമ്പോള്‍ റിലയന്‍സിന്റെ മൊത്തം പമ്പുകള്‍ 7722 ആയി ഉയരും. ഇതോടെ റിലയന്‍സ് എണ്ണ വിതരണത്തില്‍ ഇന്ത്യയിലെ ഏറ്റവും വലിയ സ്വകാര്യ കമ്പനിയായി മാറും. പൊതുമേഖലാരംഗത്തുള്ള ഇന്ത്യന്‍ ഓയില്‍ കോര്‍പറേഷന്‍, ഭാരത് പെട്രോളിയം, ഹിന്ദുസ്ഥാന്‍ പെട്രോളിയം എന്നീ കമ്പനികള്‍ക്ക് ഇന്ത്യയില്‍ ഒട്ടാകെ 90000ല്‍ പരം പമ്പുകള്‍ ഉണ്ട്.

നയാര എന്നത് പഴയ എസ്സാര്‍ ഓയില്‍
2017ല്‍ 12.9 ബില്യണ്‍ ഡോളറിനാണ് റഷ്യയുടെ റോസ് നെഫ്റ്റ് ഇന്ത്യയിലെ എസ്സാര്‍ ഓയില്‍ എന്ന കമ്പനിയെ ഏറ്റെടുത്തത്. ഇതിന്റെ പേര് പിന്നീട് നയാര എന്നാക്കി മാറ്റി. യൂറോപ്യന്‍ യൂണിയനും യുഎസും ചേര്‍ന്ന് റഷ്യയുടെ എണ്ണവിതരണത്തെ ഞെക്കിക്കൊല്ലാന്‍ ശ്രമിക്കുകയാണ്. ഇതോടെയാണ് നയാരയെ കൈവിടാന്‍ റഷ്യ ഒരുങ്ങുന്നത്. ഈ അവസരം മുതലാക്കാനാണ് മുകേഷ് അംബാനിയുടെ റിലയന്‍സ് ഒരുങ്ങുന്നത്.