ആലപ്പുഴ :സിപിഐ ആലപ്പുഴ ജില്ലാ സമ്മേളനത്തില്‍ സംസ്ഥാന നേതൃത്വത്തിനും മന്ത്രിമാര്‍ക്കുമെതിരെ രൂക്ഷ വിമര്‍ശനമുന്നയിച്ച് പ്രതിനിധികള്‍.സംസ്ഥാന നേതൃത്വത്തിന് നിലപാടില്ലെന്ന് പ്രതിനിധികള്‍ കുറ്റപ്പെടുത്തി.
കൃഷി, സിവില്‍ സപ്ലൈസ് വകുപ്പുകള്‍ വന്‍പരാജയമാണെന്നും വിമര്‍ശനമുയര്‍ന്നു. ഒരു ഭരണനേട്ടവും എടുത്തു പറയാന്‍ കൃഷി, സിവില്‍ സപ്ലൈസ് വകുപ്പുകള്‍ക്കില്ലെന്ന് പ്രതിനിധികള്‍ പറഞ്ഞു. അടിസ്ഥാന തൊഴിലാളി വിഭാഗം പാര്‍ട്ടിയോട് അകലുന്നു. കയര്‍ വ്യവസായത്തെ പാര്‍ട്ടി തിരിഞ്ഞുനോക്കുന്നില്ലെന്നും പ്രതിനിധികള്‍ കുറ്റപ്പെടുത്തി.
കൃഷി മന്ത്രിയുടെ ഓഫീസിലെ കര്‍ഷക പ്രതിഷേധം ചരിത്രത്തിലാദ്യമാണ്.വ്യവസായ സ്ഥാപനങ്ങളെ സ്വാഭാവിക മരണത്തിലേക്ക് തള്ളിവിട്ടതായും പ്രതിനിധികള്‍ ആരോപിച്ചു.സ്വന്തം വകുപ്പ് എന്ന് അഭിമാനത്തോടെ പറയാന്‍ കഴിയുന്നത് റവന്യൂ വകുപ്പ് മാത്രമെന്ന് പ്രതിനിധികള്‍ ചൂണ്ടിക്കാട്ടി.
മന്ത്രിമാര്‍ വലിയ ജാഗ്രത പാലിക്കണമെന്ന് പ്രതിനിധി സമ്മേളനത്തില്‍ നിര്‍ദേശം ഉയര്‍ന്നു. സംസ്ഥാന നേതൃത്വത്തിനെതിരെയും വിമര്‍ശനം ഉണ്ടായി. പല വിഷയങ്ങളിലും നിലപാടിലുറച്ച് നില്‍ക്കാന്‍ സംഘടന നേതൃത്വത്തിന് കഴിയുന്നില്ല.
