തിരുവനന്തപുരം: ഗവര്‍ണറുടെ അധികാരങ്ങളും കടമയും സംബന്ധിച്ച് നിലവിലെ സിലബസ് പരിഷ്‌കരിച്ച് 10-ാം ക്ലാസിലെ സാമൂഹിക ശാസ്ത്രം പാഠ പുസ്തകത്തില്‍ ഉള്‍പ്പെടുത്തുമെന്ന മന്ത്രി വി. ശിവന്‍കുട്ടിയുടെ പ്രഖ്യാപനത്തിനു പിന്നാലെ മറ്റൊരു പഠന വിഷയം കൂടി ഉള്‍പ്പെടുത്തണമെന്ന ആവശ്യം ഉയരുന്നു. നിയമസഭയിലെ നടപടികള്‍ വിദ്യാര്‍ത്ഥികള്‍ അറിയാന്‍ ജനപ്രതിനിധികള്‍ പാലിക്കേണ്ട നിയമങ്ങളും മര്യാദകളും സംബന്ധിച്ചും പാഠ്യപദ്ധതി സിലബസില്‍ വേണമെന്ന ആവശ്യമാണ് ഉയരുന്നത്. വിദ്യാലയങ്ങളില്‍ മന്ത്രിമാരും എംഎല്‍എമാരും വിവിധ പരിപാടികള്‍ക്കായി വന്നു പോകുന്നുണ്ടെങ്കിലും ഇവരുടെ അധികാരങ്ങളെ സംബന്ധിച്ച് വിദ്യാര്‍ത്ഥികള്‍ക്ക് അറിയില്ല.
നിയമസഭാ, സ്പീക്കര്‍ എന്നൊക്കെ കേട്ടിട്ടുള്ളതല്ലാതെ സഭ സമ്മേളിക്കുമ്പോള്‍ മന്ത്രിമാരും എംഎല്‍എമാരും അവിടെ പാലിക്കേണ്ട നിയമങ്ങളും മര്യാദകളും എന്തൊക്കെ, അതു നിയന്ത്രിക്കാന്‍ സ്പീക്കര്‍ക്കുള്ള അധികാരങ്ങള്‍ എന്തൊക്കെ എന്നൊന്നും അറിയില്ല. നിയമസഭയില്‍ കൈയാങ്കളി നടന്നു, കവല ചട്ടമ്പിമാരെ പോലെ വെല്ലുവിളിച്ചു, സ്പീക്കറെ ആക്രമിക്കാന്‍ പോയി, പറയാന്‍ പാടില്ലാത്ത വാക്കുകള്‍ ഉപയോഗിച്ചു, ഇറങ്ങിപ്പോയി…എന്നൊക്കെ കേള്‍ക്കുമ്പോള്‍ ഇതൊക്കെ പാടുണ്ടോ, നിയമസഭാ ചട്ടങ്ങളിലുണ്ടോ എന്നൊന്നും വിദ്യാര്‍ത്ഥികള്‍ക്ക് അറിയില്ല. അതിനാല്‍ ജനപ്രതിനിധികള്‍ നിയമസഭയില്‍ പാലിക്കേണ്ട ചട്ടങ്ങള്‍, പ്രോട്ടോകോള്‍ തുടങ്ങിയവയും സിലബസില്‍ ഉള്‍പ്പെടുത്തണമെന്ന് വിദ്യാഭ്യാസ വിദഗ്ധര്‍ ആവശ്യപ്പെടുന്നു.
എല്ലാ വിദ്യാലയങ്ങളിലും പത്രവും ഉച്ചയ്‌ക്ക് വാര്‍ത്ത വായനയുമുണ്ട്. കേരള നിയമസഭയില്‍ ബജറ്റ് സമ്മേളനത്തിനിടെ എംഎല്‍എമാര്‍ സ്പീക്കറുടെ ഫോണ്‍ തല്ലിപ്പൊളിച്ചു, കമ്പ്യൂട്ടറുകള്‍ അടിച്ചുപൊളിച്ചു, മുണ്ടുമടക്കിക്കുത്തി മേശപ്പുറത്തു ചാടിക്കയറി തുടങ്ങിയ സംഭവങ്ങള്‍ വിദ്യാര്‍ത്ഥികളുടെ ശ്രദ്ധയില്‍പ്പെട്ടിരുന്നു. ഇത് സംബന്ധിച്ചുള്ള വിദ്യാര്‍ത്ഥികളുടെ ചോദ്യങ്ങള്‍ക്ക് അധ്യാപകര്‍ മറുപടി നല്‍കാനാവാതെ വിഷമിച്ചിരുന്നു. അതിനാല്‍ സഭയില്‍ എംഎല്‍എമാര്‍ പാലിക്കേണ്ട കാര്യങ്ങള്‍ സംബന്ധിച്ച് ഹൈസ്‌കൂള്‍ തലം മുതല്‍ പഠിപ്പിക്കണം എന്നാണ് ആവശ്യം ഉയരുന്നത്.
ജന്മഭൂമി ഓണ്‍ലൈന്‍