ന്യൂയോർക്ക് : ഇസ്രായേലും ഇറാനും തമ്മിൽ നടന്നുകൊണ്ടിരിക്കുന്ന യുദ്ധത്തിനിടയിൽ യുഎസ് പ്രസിഡന്റ് ഡൊണാൾഡ് ട്രംപ് വീണ്ടും ഇറാന് കർശന മുന്നറിയിപ്പ് നൽകി. ഇസ്രായേൽ ഇറാനെതിരായി നടത്തുന്ന ആക്രമണങ്ങളിൽ അമേരിക്കയ്‌ക്ക് പങ്കില്ലെന്ന് ട്രംപ് വ്യക്തമായി പറഞ്ഞു.
ഈ സാഹചര്യത്തിൽ ഇറാൻ ഏതെങ്കിലും വിധത്തിൽ അമേരിക്കയെ ആക്രമിച്ചാൽ മുമ്പൊരിക്കലും കണ്ടിട്ടില്ലാത്ത രീതിയിൽ അമേരിക്ക പൂർണ്ണ ശക്തിയോടെ പ്രതികരിക്കും. ഇറാനും ഇസ്രായേലും തമ്മിൽ എളുപ്പത്തിൽ ഒരു കരാർ ഉണ്ടാക്കാനും ഈ രക്തരൂക്ഷിതമായ സംഘർഷം അവസാനിപ്പിക്കാനും കഴിയുമെന്നും ട്രംപ് പറഞ്ഞു.
അതേ സമയം പ്രസിഡന്റ് ഡൊണാൾഡ് ട്രംപ് ഇറാന് മുന്നറിയിപ്പ് നൽകുന്നത് ഇതാദ്യമല്ല. നേരത്തെ അവർ ചിന്തിക്കുന്നതിലും, ഊഹിക്കുന്നതിലും, പറഞ്ഞിട്ടുള്ളതിലും വളരെ മോശമായിരിക്കും തിരിച്ചടി എന്ന് ട്രംപ് ഇറാന് മുന്നറിയിപ്പ് നൽകിയിരുന്നു. ലോകത്തിലെ ഏറ്റവും മികച്ചതും മാരകവുമായ സൈനിക ഉപകരണങ്ങൾ അമേരിക്ക നിർമ്മിക്കുന്നുവെന്നും ഇസ്രായേലിന് അവയിൽ ധാരാളം ഉണ്ടെന്നും അത് എങ്ങനെ ഉപയോഗിക്കണമെന്ന് അവർക്കറിയാമെന്നും അദ്ദേഹം പറഞ്ഞിരുന്നു.
ഇതിനു പുറമെ ഇറാൻ തങ്ങളുടെ ആണവ പദ്ധതി തടയാൻ എത്രയും വേഗം ഒരു കരാർ ഉണ്ടാക്കണമെന്ന് ഡൊണാൾഡ് ട്രംപ് നേരത്തെ പറഞ്ഞിരുന്നു. കൂടുതൽ നാശം ഒഴിവാക്കാൻ ഇറാന് രണ്ടാമത്തെ അവസരമുണ്ടെന്നും ട്രംപ് സൂചിപ്പിച്ചിരുന്നു. ഇറാനിൽ ഇസ്രായേൽ നടത്തുന്ന ആക്രമണങ്ങൾക്കിടയിൽ ട്രംപ് തന്റെ ദേശീയ സുരക്ഷാ സംഘവുമായി ഒരു കൂടിക്കാഴ്ചയും നടത്തി.
