കൊല്ലം: കരുനാഗപ്പള്ളി ചെറിയഴീക്കല്‍ തീരത്ത് മുങ്ങിയ കപ്പലില്‍ നിന്നുള്ള ഒരു കണ്ടെയ്‌നര്‍ അടിഞ്ഞതായി അറിഞ്ഞതോടെ സുരക്ഷാ മുന്‍കരുതലുമായി അധികൃതര്‍. തീരദേശത്തെ വീടുകളില്‍ ഉള്ളവരോട് മാറാന്‍ നിര്‍ദേശം നല്‍കിയിട്ടുണ്ട്. കടല്‍ പ്രക്ഷുബ്ധമായതിനാല്‍ രാത്രി കൂടുതല്‍ പരിശോധന നടത്താനായിട്ടില്ലെങ്കിലും മുങ്ങിയ എംഎസ്സി എല്‍സാ 3 കപ്പലില്‍ നിന്നുള്ള കണ്ടെയ്‌നര്‍ തന്നെയാണെന്നാണ് നിഗമനം. കടല്‍ ഭിത്തിയില്‍ ഇടിച്ചു നില്‍ക്കുന്ന നിലയിലാണ് കണ്ടെയ്‌നര്‍ കണ്ടെത്തിയതെന്ന് പ്രദേശവാസികള്‍ അറിയിച്ചു. ജനവാസ മേഖലക്ക് അടുത്തായതിനാലാണ് തീരവാസികളോട് ഒഴിയാന്‍ ആവശ്യപ്പെട്ടത്. ഇത്രദൂരം ഒഴുകി വന്നതിനാല്‍ ഒഴിഞ്ഞ കണ്ടെയ്‌നറായിരിക്കാനാണ് സാധ്യത.
കൊല്ലം, ആലപ്പുഴ,എറണാകുളം, തിരുവനന്തപുരം ജില്ലകളിലെ തീരങ്ങളില്‍ കണ്ടെയ്നറുകള് എത്താന്‍ സാധ്യതയുണ്ടെന്ന് അധികൃതര്‍ നേരത്തെ അറിയിച്ചിരുന്നു.
