വാഷിങ്ടണ്‍: പാകിസ്ഥാനിലെ ലഷ്കർ-ഇ-തൊയ്ബ ഭീകര സംഘടനയുമായി ബന്ധമുള്ള രണ്ട് മുൻ ഭീകരരെ വൈറ്റ്ഹൗസ് ഉപദേശകസമിതിയിലേക്ക് നിയമിച്ച് ഡൊണാള്‍ഡ് ട്രംപ് ഭരണകൂടം. ഇവരുടെ നിയമനം ആഗോളതലത്തിൽ പ്രതിഷേധത്തിന് ഇടയാക്കിയിട്ടുണ്ട്. രണ്ട് വ്യക്തികളുടെയും നിയമനങ്ങളെക്കുറിച്ചുള്ള വിശദാംശങ്ങൾ വൈറ്റ് ഹൗസിന്റെ ഔദ്യോഗിക വെബ്‌സൈറ്റിൽ പ്രസിദ്ധീകരിച്ചിട്ടുണ്ട്.
ഇസ്മായില്‍ റോയര്‍, ഹംസ യൂസുഫ് എന്നിവരെയാണ് റിലീജിയസ് ഫ്രീഡം കമ്മിഷന്റെ ഉപദേശക സമിതിയില്‍ അംഗങ്ങളാക്കിയത്. നിയമിതരായ അംഗങ്ങളിൽ പണ്ഡിതർ എന്ന് വിശേഷിപ്പിക്കപ്പെടുന്ന രണ്ട് മുസ്ലീം വ്യക്തികളും ഉൾപ്പെടുന്നു, അവരിൽ ഒരാൾക്ക് ലഷ്കർ-ഇ-തൊയ്ബ (എൽഇടി) പോലുള്ള തീവ്രവാദ സംഘടനകളുമായി നേരിട്ട് ബന്ധമുണ്ട്.
ഇസ്മായിൽ റോയർ നിലവിൽ ഒരു അമേരിക്കൻ പൗരനാണെങ്കിലും 1990 കളുടെ അവസാനത്തിലും 2000 കളുടെ തുടക്കത്തിലും മുസ്ലീം യുവാക്കളെ തീവ്രവാദ പ്രവർത്തനങ്ങളിൽ ഉൾപ്പെടുത്തുന്നതിൽ ഇയാൾ കുപ്രസിദ്ധനായിരുന്നു. 2000 ൽ, ഇസ്മായിൽ റോയർ പാകിസ്ഥാനിലേക്ക് പോയി ലഷ്കർ-ഇ-തൊയ്ബ (എൽഇടി) ഭീകര ക്യാമ്പിൽ പരിശീലനം നേടിയതായി റിപ്പോർട്ടുണ്ട്. ആ കാലയളവിൽ, കശ്മീരിലെ ഇന്ത്യൻ സൈനിക കേന്ദ്രങ്ങൾക്ക് നേരെയുള്ള ആക്രമണങ്ങളിലും അദ്ദേഹത്തിന് പങ്കുണ്ടെന്ന് ആരോപിക്കപ്പെടുന്നു.
2003-ൽ, തീവ്രവാദവുമായി ബന്ധപ്പെട്ട കുറ്റങ്ങൾക്ക് അമേരിക്കയിൽ കുറ്റക്കാരനാണെന്ന് കണ്ടെത്തി 20 വർഷത്തെ തടവിന് ശിക്ഷിക്കപ്പെട്ടു. ഏകദേശം 13 വർഷം തടവ് ശിക്ഷ അനുഭവിച്ച ശേഷം അദ്ദേഹം മോചിതനായി. മോചിതനായതിനുശേഷം, തനിക്ക് മാനസാന്തരമുണ്ടായെന്നും റോയർ അവകാശപ്പെടുന്നു. നിലവിൽ സെന്റർ ഫോർ ഇസ്ലാം ആൻഡ് റിലീജിയസ് ഫ്രീഡത്തിൽ ഡയറക്ടറായി സേവനമനുഷ്ഠിക്കുന്നു. അവിടെ മതപരമായ സഹിഷ്ണുത വളർത്തുന്നതിനും, പരിഷ്കരണം പ്രോത്സാഹിപ്പിക്കുന്നതിനും താൻ പ്രതിജ്ഞാബദ്ധനാണെന്ന് പറയുന്നു.
അമേരിക്കയിലെ പ്രമുഖ ഇസ്ലാമിക പണ്ഡിതന്മാരിൽ ഒരാളായി കണക്കാക്കപ്പെടുന്ന ഹംസ യൂസഫ്, അമേരിക്കയിലെ ആദ്യത്തെ അംഗീകൃത ഇസ്ലാമിക ലിബറൽ ആർട്സ് കോളേജായ കാലിഫോർണിയയിലെ സൈതുന കോളേജിന്റെ സഹസ്ഥാപകനുമാണ്. ഇയാൾക്കും ജിഹാദികളുമായും നിരോധിത ഭീകരസംഘടനകളുമായും ബന്ധമുണ്ടെന്ന് വിമര്‍ശനം ഉയര്‍ന്നിട്ടുണ്ട്.
