ചണ്ഡീഗഡ്: പഞ്ചാബ് പൊലീസിലെ സീനിയർ വനിത കോൺസ്റ്റബിൾ ഹെറോയിനുമായി അറസ്റ്റിൽ. 18 ഗ്രാം ഹെറോയിനുമായി അമൻദീപ് കൗര് എന്ന ഉദ്യോഗസ്ഥയാണ് പിടിയിലായത്. പ്രതി ഥാറിലാണ് എത്തിയതെന്ന് ബട്ടിൻഡ ഡെപ്യൂട്ടി സൂപ്രണ്ട് ഓഫ് പൊലീസ് (ഡിഎസ്പി സിറ്റി 1) ഹർബൻസ് സിംഗ് ധാലിവാൾ പറഞ്ഞു.
പൊലീസും ആന്റി – നാർക്കോട്ടിക്സ് ടാസ്ക് ഫോഴ്സും (എഎൻടിഎഫ്) ചേർന്നുള്ള സംഘം ബാദൽ റോഡിൽ നടത്തിയ പരിശോധനയിൽ വാഹനം തടയുകയും മയക്കുമരുന്ന് പിടിച്ചെടുക്കുകയും ചെയ്തു. ഥാറിലെ ഗിയര് ബോക്സില് ഒളിപ്പിച്ച നിലയിലായിരുന്നു ഹെറോയിൻ. അമൻദീപ് മൻസ പൊലീസിലെ ഉദ്യോഗസ്ഥയായിരുന്നുവെന്നും ബട്ടിൻഡ പൊലീസ് ലൈനുകളുമായി ബന്ധപ്പെട്ട് ജോലി ചെയ്യുകയായിരുന്നുവെന്നും ധാലിവാൾ പറഞ്ഞു.
അറസ്റ്റിലായ വനിതാ പൊലീസ് ഉദ്യോഗസ്ഥ കുറേക്കാലമായി പൊലീസിന്റെ നിരീക്ഷത്തിലായിരുന്നുവെന്നാണ് ബന്ധപ്പെട്ട വൃത്തങ്ങൾ പറയുന്നത്. സോഷ്യൽ മീഡിയയിൽ ഇൻസ്റ്റ ക്വീൻ എന്നറിയപ്പെടുന്ന വൈറൽ താരമാണ് അമൻദീപ് കൗർ. പതിവായി ഇൻസ്റ്റഗ്രാമിൽ പൊലീസ് യൂണിഫോമിൽ റീലുകൾ പങ്കുവയ്ക്കുമായിരുന്നു. 40,000 ത്തോളം പേരാണ് ഇവരെ ഇൻസ്റ്റഗ്രാമിൽ പിന്തുടരുന്നത്. ആഡംബര ജീവിതം നയിച്ചിരുന്ന യുവതിക്കെതിരെ വിവിധ ആരോപണങ്ങളും ഉയർന്നിരുന്നു. 2 കോടി രൂപയുടെ വീടാണ് ഇവർക്കുണ്ടായിരുന്നത്. ലക്ഷങ്ങൾ വിലമതിക്കുന്ന കാറുകളാണ് ഉപയോഗിക്കുന്നത്
