തിരുവനന്തപുരം: ഈ സാമ്പത്തിക വര്ഷം എത്ര തുക കടമെടുക്കാന് അനുമതിയുണ്ടെന്ന് കേന്ദ്രസര്ക്കാര് അറിയിക്കുംമുന്പ് കടമെടുപ്പ് കലണ്ടര് റിസര്വ് ബാങ്കിന് കൈമാറി സംസ്ഥാന സര്ക്കാര്. കലണ്ടര് പ്രകാരം 45000 കോടി രൂപയാണ് ഈ വര്ഷം കടമെടുക്കാന് സംസ്ഥാന സര്ക്കാര് ഉദ്ദേശിക്കുന്നത്. ഇതിന്റെ കാല് ഭാഗമായ 11000 കോടി രൂപ ആദ്യ മൂന്നുമാസത്തേയ്ക്ക് കടമെടുക്കാന് സര്ക്കാര് ലക്ഷ്യമിടുന്നു. കടുത്ത സാമ്പത്തിക പ്രതിസന്ധിയില് നില്ക്കുന്നതിനാല് എത്രയും പെട്ടെന്ന് കടമെടുക്കാനാണ് സര്ക്കാര് ആലോചിക്കുന്നത്. സാമ്പത്തിക വര്ഷം ആരംഭിക്കും മുന്പ് വേണ്ട തയ്യാറെടുപ്പുകള് നടത്തി കലണ്ടര് തയ്യാറാക്കുകയും റിസര്വ് ബാങ്കിന് കൈമാറുകയുമായിരുന്നു. കലണ്ടര് വൈകിയതിന്റെ പേരില് കടമെടുപ്പ് വൈകാതെ നോക്കുകയാണ് ലക്ഷ്യം. ശമ്പളം, പെന്ഷന്, ക്ഷേമപെന്ഷന് എന്നിവയ്ക്കൊപ്പം കഴിഞ്ഞവര്ഷം മാറ്റിവച്ച ട്രഷറി ബില്ലുകള്ക്കും അടിയന്തിരമായി പണം കണ്ടെത്തേണ്ടതുണ്ട്.
