തിരുവനന്തപുരം: ജന്മഭൂമി സുവര്‍ണ ജൂബിലി ആഘോഷങ്ങളോടനുബന്ധിച്ച് സംഘടിപ്പിക്കുന്ന ‘ലഹരിവിരുദ്ധ ജാഗ്രതാ യാത്ര’ നാളെ. ആറ്റിങ്ങല്‍ പാര്‍ലമെന്റ് മണ്ഡലത്തിലെ യാത്രയാണ് നാളെ സംഘടിപ്പിക്കുന്നത്.
നാളെ രാവിലെ 9.30ന് ഗുരുദേവ സമാധിസ്ഥാനമായ ശിവഗിരിയില്‍ സ്വാമി ശുഭാംഗാനന്ദ ദീപപ്രോജ്വലനം നടത്തുന്നതോടെ ആരംഭിക്കുന്ന യാത്രയ്‌ക്ക് മുന്‍ കേന്ദ്രമന്ത്രി വി. മുരളീധരന്‍ നേതൃത്വം നല്‍കും. ‘ഉണരാം ലഹരിക്കെതിരെ’ എന്ന സന്ദേശമുയര്‍ത്തിയാണ് പരിപാടി സംഘടിപ്പിച്ചിട്ടുള്ളത്. ശിവഗിരിയില്‍ മുന്‍ ഡിജിപിയും ജന്മഭൂമി ലഹരിവിരുദ്ധയാത്രാ ചെയര്‍പേഴ്‌സണുമായ ആര്‍. ശ്രീലേഖയും പങ്കെടുക്കും.
ശിവഗിരിയില്‍ നിന്നു തുടങ്ങി വര്‍ക്കല, ആറ്റിങ്ങല്‍, വെഞ്ഞാറമൂട്, നെടുമങ്ങാട്, വെള്ളനാട്, കാട്ടാക്കട എന്നിവിടങ്ങളിലെ ജാഗ്രതാ സദസുകളില്‍ വി. മുരളീധരനെ കൂടാതെ സമൂഹത്തിലെ പ്രമുഖ വ്യക്തിത്വങ്ങളും സംസാരിക്കും. നൂറുക്കണക്കിനാളുകള്‍ ഓരോ സ്ഥലത്തും അണിചേര്‍ന്ന് ലഹരിവിരുദ്ധ പ്രതിജ്ഞയെടുക്കും. ‘ലഹരിയെ അകറ്റാം, ജീവിതം ലഹരിയാക്കാം’ എന്ന സന്ദേശം പ്രചരിപ്പിക്കാന്‍ എല്ലാ കേന്ദ്രങ്ങളിലും ലഹരി ഉപയോഗത്തിന്റെ അപകടങ്ങള്‍ വിശദീകരിച്ച് ലഘുലേഖകളും വിതരണം ചെയ്യും.
സമ്മേളന സ്ഥലങ്ങളില്‍ ലഹരി ബോധവത്കരണത്തിന്റെ ഭാഗമായി തെരുവ് നാടകം, പാവകളി, കവിയരങ്ങ്, നാടന്‍പാട്ടുകള്‍ എന്നിവ അവതരിപ്പിക്കും. ചലച്ചിത്ര സംവിധായകനും നടനുമായ മേജര്‍ രവി, ചലച്ചിത്ര നടി പ്രവീണ, നെടുമങ്ങാട് മുനിസിപ്പല്‍ ചെയര്‍പേഴ്‌സണ്‍ ശ്രീജ തുടങ്ങി നിരവധി പ്രമുഖര്‍ ലഹരി വിരുദ്ധയാത്രയ്‌ക്കൊപ്പം ചേരും. സാമുദായിക നേതാക്കള്‍, മതമേലധ്യക്ഷന്മാര്‍, പൊതുപ്രവര്‍ത്തകര്‍, പോലീസ്- എക്‌സൈസ് ഉദ്യോഗസ്ഥര്‍, സാഹിത്യ- സാംസ്‌കാരിക മേഖലകളിലുള്ളവര്‍, അദ്ധ്യാപകര്‍ തുടങ്ങിയവരെല്ലാം വ്യത്യസ്ത പരിപാടികളുടെ ഭാഗമാകും.
തിരുവനന്തപുരം ലോക്‌സഭാ മണ്ഡലത്തിലെ യാത്ര ഏപ്രില്‍ 3ന് പാറശ്ശാലയില്‍ നിന്ന് ആരംഭിച്ച് മാനവീയം വീഥിയില്‍ സമാപിക്കും. കൊച്ചി കപ്പല്‍ശാലയും ശ്രീപദ്മനാഭ സേവാസമിതിയുമായി സഹകരിച്ചാണ് പരിപാടി സംഘടിപ്പിച്ചിട്ടുള്ളത്.
പ്രതികരിക്കാൻ ഇവിടെ എഴുതുക: