ദുബായ്: ഐസിസി ചാമ്പ്യന്ഷിപ്പിലെ അവസാന ഗ്രൂപ്പ് പോരില് ഭാരതത്തിന് ജയം. ന്യൂസിലന്ഡിനെ 44 റണ്സിന് തോല്പ്പിച്ചു. അഞ്ച് വിക്കറ്റ് പ്രകടനവുമായി വരുണ് ചക്രവര്ത്തിയുടെ മാസ്മരിക സ്പിന് മികവും ശ്രേയസ് അയ്യരുടെ അര്ദ്ധ സെഞ്ച്വറിയും ഭാരത വിജയത്തില് നിര്ണായകമായി. വരുണിന്റെ ഏകദിന പരീക്ഷണം വന് വിജയമാകുന്നത് ആദ്യമായാണ്.
ആദ്യം ബാറ്റ് ചെയ്ത ഭാരതം നിശ്ചിത 50 ഓവറില് ഒമ്പത് വിക്കറ്റ് നഷ്ടത്തില് 249 റണ്സെടുത്തു. ഇതിനെതിരെ കിവീസ് 45.3 ഓവറില് 205 റണ്സില് ഓള് ഒട്ടായി.
ഭാരതം മുന്നില് വച്ച 250 റണ്സ് വിജയലക്ഷ്യത്തിന് മുന്നില് കിവീസ് നിരയില് മുന് നായകന് കെയ്ന് വില്ല്യംസണ് മാത്രമാണ് പൊരുതി നിന്നത്. 120 പന്തുകള് നേരിട്ട വില്ല്യംസണ് 81 റണ്സെടുത്തു. കിവീസ് ടോട്ടല് 41 ഓവറില് 169 റണ്സിലെത്തിനില്ക്കെ വില്ല്യംസണിനെ അക്ഷര് പട്ടേല് പുറത്താക്കിയതും ഭാരത വിജയത്തില് നിര്ണായകമായി.
ജയത്തെ തുടര്ന്ന് ആറ് പോയിന്റുമായി ഗ്രൂപ്പ് എയില് ഭാരതം ജേതാക്കളായി. നാല് പോയിന്റുള്ള ന്യൂസിലന്ഡ് റണ്ണറപ്പുകളും. ചൊവ്വാഴ്ച്ച ദുബായില് നടക്കുന്ന ആദ്യ സെമിയില് ഗ്രൂപ്പ് ബി രണ്ടാം സ്ഥാനക്കാരായ ഓസ്ട്രേലിയ ആയിരിക്കും എതിരാളികള്. ബുധനാഴ്ച്ച നടക്കുന്ന രണ്ടാം സെമിയില് ന്യൂസീലന്ഡ് ദക്ഷിണാഫ്രിക്കയെ നേരിടും. അടുത്ത ഞായറാഴ്ച്ചയാണ് ഫൈനല്.
നേരത്തെ ടോസ് നഷ്ടപ്പെട്ട ഭാരതം കിവീസിന്റെ കനത്ത ബൗളിങ്ങ് മികവിന് മുന്നില് തകര്ച്ചയോടെയാണ് തുടങ്ങിയത്. ശ്രേയസ് അയ്യരുടെ(79) പോരാട്ട വീര്യം ഭാരത ഇന്നിങ്സിന് ആശ്വാസമായി. മൂന്നിന് 30 എന്ന നിലയില് തകര്ന്ന ടീമിനെ ശ്രേയസും അക്ഷര് പട്ടേലും ചേര്ന്ന് കരകയറ്റി. അക്ഷര് പട്ടേല് വിലപ്പെട്ട 42 റണ്സ് കൂട്ടിചേര്ത്ത് ശ്രേയസിന് പിന്തുണ നല്കി. സ്കോര് 128ല് നില്ക്കെ രചിന് രവീന്ദ്രയുടെ പന്തില് അക്ഷര് പുറത്തായി. തുടര്ന്നെത്തിയ കെ.എല്. രാഹുലിനെ കൂട്ടുപിടിച്ച് ശ്രേയസ് അയ്യര് പൊരുതിയെങ്കിലും ഭാരത സ്കോര് 36.2 ഓവറില് 172 റണ്സിലെത്തിയപ്പോള് ശ്രേയസ് പുറത്തായി. നാല് ഫോറും രണ്ട് സിക്സും അടങ്ങുന്നതായിരുന്നു ശ്രയേസിന്റെ പ്രകടനം. അധികം വൈകാതെ രാഹുലിനെയും(23) നഷ്ടപ്പെട്ട ഭാരതത്തെ സ്ട്രോക്ക് പ്ലേയിലൂടെ ഹാര്ദിക് പാണ്ഡ്യ മുന്നോട്ടു നയിച്ചു. 45 പന്തുകളില് നാല് ബൗണ്ടറികളും രണ്ട് സിക്സറും സഹിതം 45 റണ്സെടുത്ത് അവസാന ഓവറില് ഹാര്ദിക് പുറത്താകുമ്പോള് ഭാരതം മാന്യമായ ടോട്ടല് സ്വന്തമാക്കിയിരുന്നു. ഇതിനിടെ രവീന്ദ്ര ജഡേജ(16) പുറത്തായി. കുല്ദീപ് യാദവ്(ഒന്ന്) പുറത്താകാതെ നിന്നു. ഭാരത ഇന്നിങ്സിന്റെ അവസാന പന്തില് മുഹമ്മദ് ഷമി(അഞ്ച്) പുറത്തായി.
ന്യൂസിലന്ഡിനായി പേസര് മാറ്റ് ഹെന്റി അഞ്ച് വിക്കറ്റ് പ്രകടനവുമായി മിന്നി. മറ്റ് ബൗളര്മാരില് മൈക്കല് ബ്രെയ്സ്വെല് ഒഴികെ എല്ലാവരും ഓരോ വിക്കറ്റ് വീഴ്ത്തി.
