മലപ്പുറം: പെരിന്തല്മണ്ണയില് ഭര്തൃ വീട്ടില് റിംഷാനയെന്ന യുവതി മരിച്ച സംഭവത്തില് ഭര്ത്താവിനെതിരെ കേസെടുത്തു.റിംഷാനയുടെ ഭര്ത്താവ് മുസ്തഫക്കെതിരെയാണ് പൊലീസ് കേസെടുത്തത്.
സ്ത്രീധനം ആവശ്യപ്പെട്ട് പീഡിപ്പിച്ചെന്നാണ് കേസ്. ഭര്ത്താവിനെതിരെ യുവതിയുടെ കുടുംബം ഗുരുതര ആരോപണങ്ങള് ഉന്നയിച്ചിരുന്നു. രണ്ടാമതും പെണ്കുഞ്ഞിനെ പ്രസവിച്ചതോടെ മുസ്തഫ മകളെ പീഡിപ്പിക്കാന് തുടങ്ങിയെന്ന് റിംഷാനയുടെ മാതാവ് പറഞ്ഞു.
ജനുവരി 5നാണ് പെരിന്തല്മണ്ണ എടപ്പറ്റ പാതിരിക്കോട് മേലേതില് റിംഷാന ഇവര് താമസിച്ചിരുന്ന വാടക ക്വാര്ട്ടേഴ്സില് മരിച്ചത്. മരണത്തിലെ ദുരൂഹത പുറത്തുകൊണ്ടുവരണമെന്ന് മാതാവ് ആവശ്യപ്പെടുന്നു. പെരിന്തല്മണ്ണയിലെ സ്വകാര്യ സ്ഥാപനത്തില് ജോലി ചെയ്യുകയായിരുന്നു ഏഴും അഞ്ചും വയസ് പ്രായമുളള രണ്ട് പെണ്മക്കളുടെ അമ്മയായ റിംഷാന.
റിംഷാനയുടെ മൃതദേഹത്തില് കരുനീലിച്ച പാടുകളുണ്ടായിരുന്നുവെന്ന് കുടുംബം ആരോപിച്ചിരുന്നു. ഒന്പതു വര്ഷം മുന്പാണ് റിംഷാനയും മുസ്തഫയും വിവാഹതയായത്. മൂന്നു വര്ഷം മുന്പ് റിംഷാന വിവാഹ മോചനത്തിന് ശ്രമം നടന്നിരുന്നുവെന്നും വിവരമുണ്ട്.
