ആലപ്പുഴ: മത്സ്യ,കക്ക തൊഴിലാളികളുടെ പ്രതിഷേധങ്ങള്‍ അവഗണിച്ച് സംസ്ഥാന സര്‍ക്കാര്‍ വേമ്പനാട് കായലില്‍ മണല്‍ ഖനനം ആരംഭിച്ചു. ദേശീയപാതയുടെ നിര്‍മാണത്തിനാവശ്യമുള്ള മണ്ണിനായാണ് കായലില്‍ പുന്നമട ഭാഗത്ത് ഡ്രഡ്ജിങ് നടത്തുന്നതെന്നാണ് അധികൃതര്‍ പറയുന്നത്. ആഗസ്ത് 31 വരെ ആവശ്യമായ മണ്ണ് സൗജന്യമായി ഡ്രഡ്ജ് ചെയ്യാന്‍ സംസ്ഥാന സര്‍ക്കാര്‍ അനുമതി നല്‍കിയിരുന്നു.
പുന്നമട സ്റ്റാര്‍ട്ടിങ് പോയിന്റിന് വടക്ക് വേമ്പനാട്ടു കായലില്‍ ദേശീയ ജലപാതയ്‌ക്ക് പടിഞ്ഞാറുഭാഗത്ത് മൂന്നര കിലോമീറ്റര്‍ നീളത്തില്‍ മൂന്നിടങ്ങളില്‍ ഡ്രഡ്ജിങ് നടത്തും. ഇതില്‍ ഒരിടത്താണ് ഡ്രഡ്ജിങ് തുടങ്ങിയത്. ദേശീയപാതയില്‍ തുറവൂര്‍ പറവൂര്‍ റീച്ചിന്റെ നിര്‍മാണക്കരാറുള്ള കെസിസി ബില്‍ഡ്‌കോണ്‍ കമ്പനിക്കാണ് വേമ്പനാട് കായല്‍ ഡ്രഡ്ജ് ചെയ്ത് മണ്ണെടുക്കാനുള്ള അനുമതി നല്‍കിയത്. തുറവൂര്‍ പറവൂര്‍ റീച്ചിലെ അടിപ്പാതകളും മേല്‍പാലങ്ങളും ഉള്‍പ്പെടെയുള്ളവയുടെ അപ്രോച്ച് റോഡ് നിര്‍മാണത്തിനാണ് മണ്ണ് കൂടുതലായും ഉപയോഗിക്കുക.
മൂന്നുമീറ്റര്‍ വരെ ആഴത്തില്‍ പൈപ്പിറക്കിയാണ് മണ്ണെടുക്കുന്നത്. കരയില്‍ കുളംപോലെ വലിയ കുഴി നി ര്‍മിച്ച്, നാലുവശവും ബണ്ട് പോലെ കെട്ടി ഉയര്‍ത്തി. ഡ്രഡ്ജര്‍ ഉപയോഗിച്ച് ശേഖരിക്കുന്ന മണ്ണ് വെള്ളത്തോടെപ്പം ഉയര്‍ന്ന മര്‍ദത്തില്‍ പൈപ്പിലൂടെ ഈ കുഴിയിലേക്കെത്തിച്ചു. കുഴിയിലാണ് വെള്ളവും മണ്ണും വേര്‍തിരിക്കുന്നത്. വെള്ളവും മാലിന്യങ്ങളും ഒഴുകിപ്പോയ ശേഷം കുഴിയില്‍ ബാക്കിയാവുന്ന മണ്ണ്, മണ്ണുമാന്തി ഉപയോഗിച്ച് കരയിലേക്ക് നീക്കുകയാണ്.
