ന്യൂഡല്‍ഹി : ‘കഷായകൊലപാതക’ കേസില്‍ വധശിക്ഷയ്‌ക്ക് വിധിക്കപ്പെട്ട ഗ്രീഷ്മയ്‌ക്ക് പ്രതീക്ഷ നല്‍കുന്ന ഉത്തരവുമായി സുപ്രീംകോടതി. ഒന്നിലധികം കൊലപാതകം നടത്തിയ കേസില്‍ പോലും വധശിക്ഷ കഴിയുന്നതും ഒഴിവാക്കണമെന്നാണ് മറ്റൊരു കേസില്‍ സുപ്രീം കോടതി അഭിപ്രായപ്പെട്ടത്. കുറ്റവാളികള്‍ക്ക് തെറ്റു തിരുത്താന്‍ അവസരം നല്‍കണം. വധശിക്ഷ നിയമമല്ലെന്നും അതിന് അപവാദമാണെന്നും ജസ്റ്റിസ് സഞ്ജയ് കൗള്‍ അധ്യക്ഷനായ ബെഞ്ച് വ്യക്തമാക്കി. ഭാര്യയെയും നാല് പെണ്‍മക്കളെയും കൊലപ്പെടുത്തിയ കേസില്‍ ഉത്തര്‍പ്രദേശ് സ്വദേശിയായ ദീന്‍ദയാല്‍ തീവാരിയുടെ വിധശിക്ഷ ജീവപര്യന്തമാക്കിക്കൊണ്ടാണ് കോടതി ഇക്കാര്യം പറഞ്ഞത്. പ്രതി മുന്‍പ് കുറ്റം ചെയ്തിട്ടില്ല എന്നതും മാനസാന്തരത്തിനുള്ള സാധ്യതയും വിലയിരുത്തിയാണ് ശിക്ഷാ ഇളവ് നല്‍കിയത്.
