ലക്‌നൗ: അമ്മയെയും നാല്‌ സഹോദരിമാരെയും ക്രൂരമായി കൊലപ്പെടുത്തിയ 24 കാരൻ പിടിയിലായി. ലക്നൗവിലെ ഹോട്ടലിലാണ്‌ ബുധനാഴ്‌ച രാവിലെയോടെ കുടുംബത്തിലെ കുട്ടികളുൾപ്പെടെ അഞ്ചു പേരെയും കൊല്ലപ്പെട്ട നിലയിൽ കണ്ടെത്തിയത്‌. സംഭവത്തിൽ പ്രതിയായ അർഷാദിനെ പോലീസ് അറസ്റ്റ് ചെയ്തിട്ടുണ്ട്.
അർഷാദിന്റെ മാതാവ് അസ്മ, ആലിയ (9), അൽഷിയ (19), അക്സ (16), റഹ്മീൻ (18) സഹോദരിമാരുമാണ്‌ കൊല്ലപ്പെട്ടത്. ആഗ്രയിൽ നിന്നുള്ള കുടുംബം ഡിസംബർ 30 മുതൽ ലക്നൗവിലെ ഹോട്ടലിൽ താമസിച്ച് വരികയായിരുന്നു. കുടുംബത്തിന് ആഗ്രയിലുള്ള സ്വത്തുക്കളിൽ അയൽവീട്ടുകാർക്ക് നോട്ടമുണ്ടെന്നും സഹോദരിമാരെ ഹൈദരാബാദിലേക്ക് വിൽക്കാനുള്ള ശ്രമങ്ങൾ ചിലർ നടത്തുന്നുണ്ടെന്നുമാണ് വീഡിയോയിൽ അർഷാദ് പറയുന്നത്. കുടുംബത്തിന്റെ ദുർഗതി കണ്ട് മനംനൊന്താണ് അമ്മയേയും സഹോദരിമാരെയും കൊലപ്പെടുത്തിയതെന്നും അവരെ മറ്റാരും ഉപദ്രവിക്കാതിരിക്കാൻ വേണ്ടിയാണ് ഇല്ലാതാക്കിയതെന്നും അർഷാദ് പറയുന്നു.
ലക്നൗവിലെ നാക പ്രദേശത്തെ ശരൺജിത്‌ ഹോട്ടലിൽ വച്ചായിരുന്നു കൊലപാതകമെന്ന്‌ സെൻട്രൽ ലക്നൗവിലെ ഡെപ്യൂട്ടി കമ്മീഷണർ ഓഫ്‌ പൊലീസ്‌ (ഡിസിപി) രവീണ ത്യാഗി പിടിഐയോട്‌ പറഞ്ഞു. പ്രതിയായ അർഷാദിനെ ക്രൂരകൃത്യം നടന്ന സ്ഥലത്ത്‌ നിന്ന് ലോക്കൽ പൊലീസ്‌ അറസ്റ്റ് ചെയ്തതായും രവീണ ത്യാഗി അറിയിച്ചു.
വീട്ടിലുണ്ടായിരുന്ന പ്രശ്‌നങ്ങളാണ്‌ ആഗ്ര സ്വദേശിയായ അർഷാദിനെ കൊലപാതകത്തിലേക്ക്‌ നയിച്ചതെന്നാണ്‌ പൊലീസിന്റെ പ്രാഥമിക നിഗമനം. കൂടുതൽ തെളിവെടുപ്പുകൾക്കായി സംഭവസ്ഥലത്ത്‌ ഫോറൻസിക്‌ സംഘം എത്തിയിട്ടുണ്ട്‌.
പ്രതികരിക്കാൻ ഇവിടെ എഴുതുക: