കാലഭൈരവ ക്ഷേത്രത്തിനുള്ളിൽ കേക്ക് മുറിച്ച് ബർത്ത്‌ഡേ ആഘോഷിച്ച് മോഡൽ ; പ്രതിഷേധവുമായി ഭക്തർ

വാരാണസി: കാലഭൈരവ ക്ഷേത്രത്തിനുള്ളിൽ കേക്ക് മുറിച്ച് ബർത്ത്‌ഡേ ആഘോഷിച്ച മോഡലിനെതിരെ പ്രതിഷേധം . ഇൻസ്റ്റഗ്രാമിൽ ഒരു മില്യൺ ഫോളോവേഴ്‌സുള്ള മോഡൽ മമത റായിയാണ് ക്ഷേത്രത്തിനുള്ളിൽ കേക്ക് മുറിച്ച് പിറന്നാൾ ആഘോഷിച്ചത്.

ക്ഷേത്രത്തിലെ പ്രതിഷ്ഠയ്‌ക്ക് സമീപത്തുനിന്ന് കേക്ക് മുറിക്കുന്ന വീഡിയോ ഇവർ സാമൂഹ്യ മാദ്ധ്യമങ്ങളിലും പങ്കുവച്ചു. വീഡിയോയിൽ ഒരു ബൊക്കയുമായി ക്ഷേത്രത്തിലെത്തുന്ന ഇവർ ഇത് പൂജാരിക്ക് കൈമാറുന്നത് കാണാം. തുടർന്ന് പ്രതിഷ്ഠക്ക് സമീപത്തുള്ള കാണിക്കവഞ്ചിക്ക് പുറത്തുവെച്ച് കേക്ക് മുറിക്കുന്നു. ആദ്യകഷ്ണം വിഗ്രഹത്തിന് സമീപം വയ്‌ക്കുകയും ചെയ്യുന്നുണ്ട്.

വാരണാസിയിലെ കാശി വിദ്വത് പരിഷത്ത് വീഡിയോയ്‌ക്കെതിരെ ശക്തമായ വിമർശനമുന്നയിച്ചു. പ്രതിഷേധം ശക്തമായതോടെ ക്ഷേത്രത്തിനുള്ളിൽ കേക്ക് മുറിക്കുന്നതും വഴിപാട് നടത്തുന്നതും നിരോധിക്കാൻ ക്ഷേത്ര ഭരണസമിതി തീരുമാനിച്ചിരിക്കുകയാണ്. വീഡിയോ വ്യാപകമായി പ്രചരിച്ചതോടെ ഭക്തരും മത നേതാക്കളുമടക്കം സംഭവത്തിനെതിരെ വിമർശനവുമായി രംഗത്തെത്തി.