കണ്ണൂര്: അഖിലഭാരതീയ പൂര്വസൈനിക സേവാപരിഷത്ത് ഓള് ഇന്ത്യ ജനറല്ബോഡി യോഗത്തിന്റെ ഭാഗമായി ജില്ലാ സെക്രട്ടറി കെ.പി. അജിത്കുമാര് ക്യാപ്റ്റനായ കൊടിമര ജാഥയ്ക്ക് വിവിധ കേന്ദ്രങ്ങളില് സ്വീകരണം. ഇന്നലെ വൈകുന്നേരം മൂന്ന് മണിക്ക് നായാട്ടുപാറ കൊടോളിപ്രത്തെ വീരബലിദാനി നായക്ക് രതീഷിന്റെ സ്മൃതികുടീരത്തില് നിന്നാരംഭിച്ച ചടങ്ങില് അദ്ദേഹത്തിന്റെ അമ്മ ഓമന ജാഥാ ക്യാപ്റ്റന് കൊടിമരം കൈമാറി. സ്വാഗതസംഘം ചെയര്മാന് സി. രഘുനാഥും സംസ്ഥാന ജനറല് സെക്രട്ടറി മധുവട്ടവിളയും സമ്മേളന നഗരിയില് കൊടിമരം ഏറ്റുവാങ്ങി.
പൂര്വസൈനിക സേവാപരിഷത്ത് തലശ്ശേരി താലൂക്ക് പ്രസിഡന്റ് ഇ.കെ. മോഹനന്റെ നേതൃത്വത്തില് കൊടോളിപ്രത്തെ നായക്ക് രതീഷിന്റെ സ്മൃതികുടീരത്തില് പുഷ്പാര്ച്ചന നടത്തിയ ശേഷമാണ് ചടങ്ങ് ആരംഭിച്ചത്. തുടര്ന്ന് ഓമനയെ ജാഥാ ക്യാപ്റ്റന് അജിത്കുമാര് പൊന്നാടയണിയിച്ച് ആദരിച്ചു. തലശ്ശേരി താലൂക്ക് രക്ഷാധികാരി മോഹനന് നായാട്ടുപാറ, ജനറല് സെക്രട്ടറി ധനേഷ് തെരൂര്, ജില്ലാ കമ്മിറ്റിയംഗം പി. രാജീവ് തുടങ്ങിയവര് സംബന്ധിച്ചു.
ഇന്ന് രാവിലെ എട്ട് മണിക്ക് കണ്ണൂര് യുദ്ധസ്മാരകത്തില് നിന്ന് ദീപശിഖാ പ്രയാണം ആരംഭിക്കും. കേണല് എം.കെ. ഗോവിന്ദന് ദീപശിഖ കൈമാറും. സംസ്ഥാന പ്രസിഡന്റ് മേജര് ജനറല് ഡോ. പി. വിവേകാനന്ദന് സമ്മേളന നഗരിയില് ദീപശിഖ ഏറ്റുവാങ്ങും. 8.30ന് പതാക ഉയര്ത്തല്. 10 മണിക്ക് കോര് കമ്മിറ്റി, വൈകിട്ട് മൂന്നിന് മാനേജ്മെന്റ് കമ്മിറ്റി.
