കൊല്‍ക്കത്ത : ഡോ സി.വി. ആനന്ദബോസ് ബംഗാളില്‍ ഗവര്‍ണര്‍ പദവിയില്‍ രണ്ടുവര്‍ഷം പൂര്‍ത്തിയാക്കുന്ന വേളയില്‍ രാജ്ഭവന്‍ രൂപം നല്‍കിയ ‘അപ്നാ ഭാരത് ജഗ്ത ബംഗാള്‍’പരിപാടിയില്‍ കേരളത്തിന്റെ പരമ്പരാഗത ആയോധനകലയായ കളരിപ്പയറ്റും
പെണ്‍കുട്ടികള്‍ക്കായി ആവിഷ്‌കരിക്കുന്ന ‘അഭയ പ്ലസ് സ്വയം പ്രതിരോധ പരിശീലന പരിപാടി’യിലാണ് കരാട്ടേയ്‌ക്കൊപ്പം കളരിപ്പയറ്റും ഉള്‍പ്പെടുത്തുന്നത്.
കഴിഞ്ഞ ദിവസം നോര്‍ത്ത് 24 പര്‍ഗാനസ് ജില്ലയിലെ ബരാസത്തില്‍ ‘ഭായി ഫോട്ട’ പരിപാടിയില്‍ പങ്കെടുക്കവെയാണ് ഗവര്‍ണര്‍ ആനന്ദബോസ് ഇക്കാര്യം പ്രഖ്യാപിച്ചത്. ബംഗാളില്‍ കാളി പൂജയുടെ രണ്ടാം ദിവസം സഹോദരീസഹോദരബന്ധം ഊട്ടിയുറപ്പിക്കുന്നതിന് നടത്തുന്ന ആഘോഷമാണ് ‘ഭായി ഫോട്ട’
കളരിപ്പയറ്റും കരാട്ടെയും സമന്വയിപ്പിച്ചുള്ള പരിശീലനത്തിന് കളാട്ടേ’ (‘Kala-te’)’ എന്നാണ് നാമകരണം ചെയ്യുക. രണ്ടിന്റെയും മികച്ചതും പഠിക്കാന്‍ ലളിതവുമായ സാങ്കേതിക വിദ്യകള്‍ ഉള്‍പ്പെടുത്തിയുള്ള പരിശീലന പദ്ധതി തയ്യാറാക്കും. ഇതിനായി കേരളത്തില്‍ നിന്നുള്ള പരിശീലകരെ പ്രയോജനപ്പെടുത്തുമെന്ന് ആനന്ദബോസ് പറഞ്ഞു.
പെണ്‍കുട്ടികളുടെ സുരക്ഷ ഉറപ്പാക്കുന്നതിനൊപ്പം ശാരീരികമാനസിക ആരോഗ്യം മെച്ചപ്പെടുത്താനും ഈ പരിശീലനം അവരെ സഹായിക്കുമെന്നും രാജ്ഭവനില്‍ തുടക്കം കുറിക്കുന്ന പരിപാടി ക്രമേണ ഗ്രാമങ്ങളിലേക്കും വ്യാപിപ്പിക്കുമെന്നും ഗവര്‍ണര്‍ അറിയിച്ചു.
ബംഗാളില്‍ വനിതാ ഡോക്ടറെ ബലാത്സംഗം ചെയ്ത് കൊലപ്പെടുത്തിയതുള്‍പ്പെടെ സ്ത്രീകള്‍ക്കെതിരെയുള്ള അക്രമങ്ങള്‍ അനുദിനം വര്‍ധിച്ചുവരുന്ന സാഹചര്യത്തില്‍ ഗവര്‍ണര്‍ കൈക്കൊണ്ട ഈ തീരുമാനം ഏറെ ശ്രദ്ധേയമാണെന്ന് ബംഗാളിലെ സാമൂഹിക സംഘടനകളും മാധ്യമങ്ങളും ചൂണ്ടിക്കാട്ടുന്നു.
സ്ത്രീ ശാക്തീകരണം, കുട്ടികളുടെ സുരക്ഷ, സമാധാനപരിപാലനം, യുവാക്കളുടെ പങ്കാളിത്തം, സാംസ്‌കാരിക വിദ്യാഭ്യാസ പരിപോഷണം എന്നിവയ്‌ക്കുള്ള സംരംഭങ്ങള്‍ക്കൊപ്പം മനുഷ്യക്കടത്തിനും മയക്കുമരുന്ന് ദുരുപയോഗത്തിനുമെതിരായ ക്യാംപെയ്‌നും രാജ്ഭവന്‍ രൂപം നല്‍കിയിട്ടുണ്ട്.
വിവിധ സര്‍വ്വകലാശാലകള്‍ സാമൂഹികസാംസ്‌കാരിക സംഘടനകള്‍, സാംസ്‌കാരിക സ്ഥാപനങ്ങള്‍ എന്നിവയുടെ മേല്‍നോട്ടത്തിലാണ് പരിപാടികള്‍ നടപ്പാക്കുക.
ഗവര്‍ണറുടെ പുതിയ ജനസമ്പര്‍ക്ക പരിപാടിയുടെ ഭാഗമായി പശ്ചിമ ബംഗാളിലെ എല്ലാ ജില്ലകളിലുമായി 250 സ്ഥലങ്ങള്‍ അദ്ദേഹം സന്ദര്‍ശിക്കും. വിവിധ കോളേജ്, സ്‌കൂള്‍ കാമ്പസുകള്‍ സന്ദര്‍ശിച്ച് വിദ്യാര്‍ത്ഥികളെ അഭിസംബോധന ചെയ്യുകയും അവരുമായി സംവദിക്കുകയും ചെയ്യും
