ന്യൂഡൽഹി : ക്ഷയരോഗത്തെ പ്രതിരോധിക്കാന്‍ ഇന്ത്യ നടത്തിയ ശ്രമങ്ങള്‍ക്ക് ലോകാരോഗ്യ സംഘടനയുടെ പ്രശംസ. 2015 മുതല്‍ 2023 വരെയുള്ള കാലയളവില്‍ ഇന്ത്യയില്‍ ക്ഷയരോഗബാധ 18 ശതമാനം കുറയ്‌ക്കാനിടയാക്കിയ നടപടികള്‍ക്കാണ് ഡബ്ല്യു എച്ച് ഒ-യുടെ അഭിനന്ദനം. ഇന്ത്യയുടെ വികേന്ദ്രീകൃത ആരോഗ്യപരിപാലന സംവിധാനവും ടി ബി പ്രോഗ്രാമിനായി വലിയൊരു തുക വകയിരുത്തിയതുമാണ് ക്ഷയരോഗബാധയില്‍ കുറവു വരുത്താന്‍ ഇടയാക്കിയതെന്ന് ഡബ്ല്യു എച്ച് ഒ പറയുന്നു.
ക്ഷയരോഗ നിര്‍മ്മാര്‍ജന പ്രവര്‍ത്തനങ്ങള്‍ക്ക് ഇന്ത്യ അനുവര്‍ത്തിച്ച മാര്‍ഗങ്ങളെയാണ് ലോകാരോഗ്യ സംഘടന അഭിനന്ദിച്ചത്. പുതിയ ചികിത്സാരീതികളും കൃത്രിമബുദ്ധി ഉപയോഗപ്പെടുത്തുന്ന രോഗനിര്‍ണയസംവിധാനങ്ങളും ക്ഷയരോഗത്തെ പ്രതിരോധിക്കുന്ന കാര്യത്തില്‍ ഇന്ത്യ ഉപയോഗപ്പെടുത്തിയിരുന്നു.
2015 മുതല്‍ 2023 വരെയുള്ള കാലയളവില്‍ ക്ഷയരോഗബാധ 18 ശതമാനം കുറയ്‌ക്കാന്‍ ഇന്ത്യയ്‌ക്കായെന്നാണ് ലോകാരോഗ്യസംഘടനയുടെ വിലയിരുത്തല്‍. ആഗോള തലത്തില്‍ ഇക്കാലയളവില്‍ ക്ഷയരോഗബാധ എട്ടു ശതമാനം മാത്രമേ കുറയ്‌ക്കാനായിട്ടുള്ളു. രാജ്യത്തെ 1.7 ലക്ഷത്തിലധികം വരുന്ന ആയുഷ്മാന്‍ ആരോഗ്യമന്ദിറുകളിലൂടെ ക്ഷയരോഗ നിര്‍ണയം സാധ്യമാക്കിയതാണ് ഈ നേട്ടത്തിന് ആധാരമായതെന്നാണ് ആരോഗ്യമന്ത്രാലയം പറയുന്നത്. ക്ഷയരോഗബാധിതരുടെ മരണനിരക്കില്‍ 21 ശതമാനം കുറവും രേഖപ്പെടുത്തി.
