കൊല്ലം: പെൺകുട്ടികളെ ഓട്ടോറിക്ഷയിൽ കടത്തിക്കൊണ്ടുപോകാൻ ശ്രമിച്ച സംഭവത്തിൽ പ്രതി പിടിയിലായി. കൊല്ലം കാരിക്കോട് സ്വദേശി നവാസ് ആണ് പിടിയിലായത്. ഇയാളെ പോലീസ് ചോദ്യം ചെയ്തുവരികയാണ്. 12 മണിക്ക് ട്യൂഷൻ കഴിഞ്ഞ് തിരിച്ചുവരുന്ന വഴിക്കായിരുന്നു സംഭവം.
മെയിൻ റോഡിലൂടെ വരികയായിരുന്ന ഓട്ടോയിലാണ് പെൺകുട്ടികൾ കയറിയത്. കുറച്ചുദൂരം സഞ്ചരിച്ചതിന് പിന്നാലെ ഓട്ടോ അമിത വേഗത്തിൽ മറ്റൊരു ഇടവഴിയിലേക്ക് കടക്കുകയായിരുന്നു. ഇത് ശ്രദ്ധയിൽപ്പെട്ടതോടെ വിദ്യാർത്ഥിനികൾ എതിർക്കാൻ ശ്രമിച്ചെങ്കിലും പ്രതി സ്പീഡ് കൂട്ടി. ഇതോടെ ഒരു വിദ്യാർത്ഥിനി ഓട്ടോയിൽ നിന്നും ചാടുകയായിരുന്നു.
ഇതിന് ശേഷം ഏറെ ദുരം കഴിഞ്ഞാണ് ഓട്ടോ നിർത്തി രണ്ടാമത്തെ പെൺകുട്ടിയെ ഇറക്കിവിട്ടത്. സംഭവത്തിൽ പെൺകുട്ടിയുടെ കൈയ്‌ക്കും കാലിനും പരിക്കേറ്റിട്ടുണ്ട്. ട്യൂഷന്‍ കഴിഞ്ഞ് മടങ്ങി വരികയായിരുന്ന പെണ്‍കുട്ടികളാണ് ഓട്ടോ സവാരിക്ക് വിളിച്ചത്.ഒരാള്‍ വാഹനത്തില്‍ നിന്ന് പുറത്ത് കടന്നുവെന്ന് മനസ്സിലായിട്ടും നവാസ് വാഹനം നിര്‍ത്താതെ പിന്നെയും മുന്നോട്ട് പോയി. തട്ടിക്കൊണ്ട് പോകല്‍ തന്നെയാണ് പ്രതി ഉദ്ദേശിച്ചതെന്നാണ് പൊലീസിന്റെ പ്രാഥമിക നിഗമനം.
