ന്യൂഡൽഹി : വ്യാജരേഖകൾ ചമച്ച് വയോധികനായ എൻആർഐയുടെ വീട് അനധികൃതമായി കൈവശപ്പെടുത്താൻ ശ്രമിച്ച എഎപി എംഎൽഎയുടെ ഭാര്യയ്ക്കെതിരെ കേസ്. . ലുധിയാനയിലെ സനൗറിൽ നിന്നുള്ള എഎപി എംഎൽഎ ഹർമീത് സിംഗ് പത്തൻമജ്രയുടെ ഭാര്യ ഗുർപ്രീത് കൗർ ഗുരി ഉൾപ്പെടെ ഏഴു പേർക്കെതിരെ സുധാർ പോലീസാണ് വഞ്ചനാക്കുറ്റത്തിന് കേസെടുത്തത്.
നച്ഛതർ സിങ്ങിന്റെ വീടാണ് ഗുർപ്രീത് കൗർ ഗുരി അടക്കമുള്ളവർ അനധികൃതമായി കൈവശപ്പെടുത്താൻ ശ്രമിച്ചത് . ആഗസ്ത് 20 ന് നച്ഛതർ സിങ്ങിനെതിരെ ഗുർപ്രീത് കൗർ ഗുരി ശാരീരിക പീഡനത്തിന് പരാതി നൽകിയിരുന്നു. എന്നാൽ കേസിൽ നച്ഛതർ സിങ്ങിന് കോടതിയിൽ നിന്ന് ജാമ്യം ലഭിച്ചു. ഇതിനുശേഷം, വീട് കൈവശപ്പെടുത്തിയവർക്കെതിരെ കേസെടുക്കണമെന്ന് ആവശ്യപ്പെട്ട് മകൻ സന്ദീപ് സിംഗ് ജഗ്പാൽ കാനഡയിലെ മിസിസാഗയിൽ നിന്ന് ജില്ലാ ലുധിയാന റൂറൽ പോലീസ് ചീഫ് എസ്എസ്പി നവനീത് സിംഗ് ബെയ്‌ന്സിന് ഇമെയിൽ പരാതി അയച്ചിരുന്നു.
കേസിൽ രണ്ട് പേരെ പോലീസ് അറസ്റ്റ് ചെയ്തു . മറ്റ് പ്രതികൾ ഒളിവിലാണെന്നും ഇവർക്കായി തെരച്ചിൽ നടത്തി വരികയാണെന്നും പോലീസ് പറഞ്ഞു.
