ആലപ്പുഴ : പീഡനക്കേസിൽ ലോക്കൽ സെക്രട്ടറിക്കെതിരെ കേസെടുക്കുകയും, സമരത്തിനിടെ സിപിഐ, സിപിഎം നേതാക്കളെ മർദ്ദിക്കുകയും ചെയ്ത സര്ക്കിൾ ഇൻസ്പെക്ടർക്ക് സ്ഥലം മാറ്റം. ആലപ്പുഴ നോർത്ത് സിഐ എസ് സജികുമാറിനെയാണ് എറണാകുളത്തേക്ക് സ്ഥലം മാറ്റിയത് .
സംഭവത്തിൽ മുഖ്യമന്ത്രിക്ക് ആര്യാട് പഞ്ചായത്ത് പ്രസിഡന്റ് പരാതി നൽകിയിരുന്നു. വാട്ടർ അതോറിറ്റി ഓഫീസിലേക്ക് സിപിഐ – സിപിഎം പഞ്ചായത്ത് അംഗങ്ങൾ നടത്തിയ ധർണ അക്രമാസക്തമാകാതിരിക്കാൻ ഇടപെട്ടതിനാണ് സ്ഥലം മാറ്റം .
മാത്രമല്ല സിപിഎം പുന്നമട ലോക്കൽ കമ്മിറ്റി സെക്രട്ടറിക്കെതിരെ പീഡന പരാതിയിൽ കേസെടുത്തതും പാർട്ടിയ്ക്ക് സഹിക്കാനായില്ല. കഴിഞ്ഞ വർഷം ഓഗസ്റ്റിൽ പാട്യം ജംഗ്ഷനിലെ പാർട്ടി ഓഫീസിൽ വെച്ചായിരുന്നു പുന്നമട ലോക്കൽ സെക്രട്ടറി എസ് എം ഇഖ്ബാലിന്റെ ലൈംഗിക അതിക്രമം . പിന്നിൽ നിന്ന് അനുവാദമില്ലാതെ കടന്ന് പിടിച്ചു. കുതറിമാറാൻ ശ്രമിച്ചിട്ടും പിടിവിട്ടില്ല. ബലം പ്രയോഗിച്ചാണ് രക്ഷപ്പെട്ടതെന്ന് പരാതിക്കാരി പറഞ്ഞു.
ഇഖ്ബാലിനെതിര രണ്ട് തവണ പാർട്ടി സെക്രട്ടറിക്ക് പരാതി നൽകിയിരുന്നു. രണ്ട് തവണയും അന്വേഷണ കമ്മീഷനെ വച്ചെങ്കിലും നടപടിയൊന്നും ഉണ്ടായില്ല. മാത്രമല്ല ഇഖ്ബാലിനെ വീണ്ടും ലോക്കൽ സെക്രട്ടറിയായി തെരഞ്ഞെടുത്തു. ഇതിന് പിന്നാലെയാണ് ആലപ്പുഴ നോർത്ത് പൊലീസിൽ പരാതി നൽകിയത്.
