പാലക്കാട്: പ്ലസ് ടു വിദ്യാര്‍ത്ഥികള്‍ തമ്മില്‍ ഏറ്റുമുട്ടല്‍. സംഘര്‍ഷത്തില്‍ ഒരു വിദ്യാര്‍ത്ഥിക്ക് കുത്തേറ്റു.കൂറ്റനാട് ആണ് സംഭവം.
കുമരനല്ലൂര്‍ ഗവ ഹയര്‍ സെക്കന്ററി സ്‌കൂള്‍, മേഴത്തൂര്‍ ഗവ ഹയര്‍ സെക്കന്ററി സ്‌കൂള്‍ എന്നിവിടങ്ങളിലെ പ്ലസ് ടു വിദ്യാര്‍ത്ഥികള്‍ തമ്മിലാണ് ഏറ്റുമുട്ടിയത്.
നാല് ദിവസമായി തൃത്താലയില്‍ നടക്കുന്ന തൃത്താല സബ് ജില്ലാ കലോത്സവത്തിനിടെയാണ് ഇരു സ്‌കൂളുകളിലെയും പ്ലസ് ടു വിദ്യാര്‍ത്ഥികള്‍ തമ്മില്‍ ആദ്യം സംഘര്‍ഷമുണ്ടായത്. പിന്നാലെ പരസ്പരം പക വീട്ടുമെന്ന് പറഞ്ഞുള്ള ഇന്‍സ്റ്റഗ്രാം റീലുകളും പുറത്തു വന്നു.
രക്ഷിതാക്കളും അധ്യാപകരും ഇടപ്പെട്ടതോടെ റീലുകള്‍ ഇരുവിഭാഗവും പിന്‍വലിച്ചു.തുടര്‍ന്ന് ഒത്തുതീര്‍പ്പിനെന്ന പേരിലാണ് ഇന്ന് വൈകിട്ട് കൂട്ടനാട് മല റോഡില്‍ ഇരു വിഭാഗവും എത്തിയത്. അവിടെ വച്ചുണ്ടായ തര്‍ക്കത്തിലാണ് മേഴത്തൂര്‍ സ്‌കൂളിലെ പ്ലസ് ടു വിദ്യാര്‍ത്ഥി അബ്ദുള്‍ ബാസിത്തിന് കുത്തേറ്റത്. വയറിന് കുത്തേറ്റ ബാസിത്തിനെ കുന്നംകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു. വിദ്യാര്‍ത്ഥിയെ കുത്തിയതിന് കുമരനെല്ലൂര്‍ ഹയര്‍ സെക്കന്ററി സ്‌കൂളിലെ മൂന്ന് പ്ലസ് ടു വിദ്യാര്‍ത്ഥികളെ ചാലിശേരി പൊലീസ് കസ്റ്റഡിയിലെടുത്തു
