തിരുവനന്തപുരം: ഒളിമ്പിക്സ് ഹോക്കിയില് രണ്ടാം തവണയും വെങ്കലമെഡല് നേട്ടം കൈവരിച്ച പി.ആര്.ശ്രീജേഷിനെ അനുമോദിക്കാന് സംസ്ഥാന സര്ക്കാര് 30 ന് വെള്ളയമ്പലം ജിമ്മി ജോര്ജ്ജ് ഇന്ഡോര് സ്റ്റേഡിയത്തില് വൈകിട്ട് 4 ന് സംഘടിപ്പിക്കുന്ന ചടങ്ങ് മുഖ്യമന്ത്രി പിണറായി വിജയന് ഉദ്ഘാടനം ചെയ്യും. കായിക മന്ത്രിയും വിദ്യാഭ്യാസ മന്ത്രിയും തമ്മിലുള്ള മൂപ്പിളമ തര്ക്കത്തെത്തുടര്ന്ന് മാസങ്ങളായി മാറ്റി വച്ച ചടങ്ങാണിത്.
ശ്രീജേഷിന് സംസ്ഥാന സര്ക്കാര് പ്രഖ്യാപിച്ച 2 കോടി രൂപ പാരിതോഷികമായി ചടങ്ങില് മുഖ്യമന്ത്രി സമ്മാനിക്കും. കായികവകുപ്പ് മന്ത്രി വി.അബ്ദുറഹിമാന് അദ്ധ്യക്ഷത വഹിക്കും. ഏഷ്യന് ഗെയിംസ് മെഡല് ജേതാക്കളായ അഞ്ച് താരങ്ങളെ പൊതുവിദ്യാഭ്യാസ വകുപ്പില് അസിസ്റ്റന്റ് സ്പോര്ട്സ് ഓര്ഗനൈസറായി നിയമിച്ചുള്ള ഉത്തരവ് ചടങ്ങില് പൊതുവിദ്യാഭ്യാസ വകുപ്പ് മന്ത്രി വി.ശിവന്കുട്ടി വിതരണം ചെയ്യും.
വൈകിട്ട് മൂന്നരയ്ക്ക് മാനവീയം വീഥിയുടെ പരിസരത്തു നിന്നു ശ്രീജേഷിനെ സ്വീകരിച്ച് തുറന്ന ജീപ്പില് ജിമ്മി ജോര്ജ്ജ് ഇന്ഡോര് സ്റ്റേഡിയത്തിലേക്ക് ആനയിക്കും. 10 സ്കൂള് ബാന്റ് സംഘങ്ങളും ജി.വി.രാജ സ്പോര്ട്സ് സ്കൂള്, സ്പോര്ട്സ് കൗണ്സില് ഹോസ്റ്റലുകള്, വിവിധ വിദ്യാഭ്യാസ സ്ഥാപനങ്ങള് എന്നിവിടങ്ങളിലെ കുട്ടികള് അകമ്പടിയേകും.
അന്താരാഷ്ട്ര, ദേശീയ കായികതാരങ്ങളും കായിക അസോസിയേഷന് പ്രതിനിധികളും ചടങ്ങില് പങ്കെടുക്കും.
