കുഴിയിൽ അകപ്പെട്ട പശുവിനെ രക്ഷപെടുത്തി ഫയർഫോഴ്സ് : സംഭവം നടന്നത് തൊടുപുഴ പെരുമ്പിള്ളിച്ചിറയിൽ

തൊടുപുഴ: പെരുമ്പിള്ളിച്ചിറ കല്ലുമാരിയിൽ കുഴിയിൽ അകപ്പെട്ട പശുവിനെ തൊടുപുഴ ഫയർഫോഴ്സ് രക്ഷപെടുത്തി. ബുധനാഴ്ച ഉച്ചക്ക് ഒരുമണിയോടെ ആയിരുന്നു സംഭവം.

ആലക്കാത്തടത്തിൽ ബെന്നിയുടെ പശുവാണ് സമീപവാസിയുടെ വീടിനോട് ചേർന്ന് നിർമാണം നടന്നുകൊണ്ടിരുന്ന സെപ്റ്റിക് ടാങ്കിന്റെ കുഴിയിൽ വീണത്. വീട്ടുകാർ വിവരം ഫയർഫോഴ്സിൽ അറിയിച്ചതിനനുസരിച്ച് ഉടൻതന്നെ സേന സ്ഥലത്തെത്തി. 8 അടി താഴ്ചയുള്ള കുഴിയിൽ കരിങ്കല്ലുകൾ കിടന്നിട്ടുള്ളതിനാൽ പശുവിന്റെ കാലുകളും അതിൽ ഉടക്കി കിടക്കുകയായിരുന്നു.

സീനിയർ ഫയർ ഓഫീസർമാരായ ബിബിൻ എ തങ്കപ്പൻ, സജീവ് പി ജി, ഹോം ഗാർഡ് ബെന്നി എന്നിവർ കുഴിയിൽ ഇറങ്ങി റെസ്ക്യു ബെൽറ്റ് ഉപയോഗിച്ച് പശുവിനെ ആദ്യം സുരക്ഷിതമായി ബന്ധിച്ചു. വലിയ പശുവിനെ കരക്കെത്തിക്കാൻ പ്രയാസം നേരിട്ടതിനാൽ തുടർന്ന് ജെ സി ബി വിളിച്ചുവരുത്തി റെസ്ക്യു ബെൽറ്റ് അതിൽ ബന്ധിച്ച് കരയ്‌ക്ക് എത്തിച്ചു.

കരിങ്കല്ലിലേക്ക് വീണതിനാൽ പശുവിന് ചെറിയ രീതിയിൽ പരിക്കുകൾ പറ്റിയിരുന്നു. അസിസ്റ്റന്റ് സ്റ്റേഷൻ ഓഫീസർ ബിനു സെബാസ്റ്റ്യൻ, സീനിയർ ഫയർ ഓഫീസർമാരായ ഉബാസ് കെഎ, ജെയിംസ് പുന്നൻ എന്നിവരും സംഘത്തിൽ ഉണ്ടായിരുന്നു.