ജെറുസലേം: ഇറാനുവേണ്ടി ചാരവൃത്തി നടത്തിയ ഏഴു പേരെ ഇസ്രയേലി പോലീസ് അറസ്റ്റ് ചെയ്തു. അറസ്റ്റിലായവര്‍ ഇസ്രയേല്‍ പൗരന്മാര്‍ തന്നെയാണ്. കഴിഞ്ഞമാസമാണ് ഇവര്‍ പിടിയിലായത്. യുദ്ധസമയത്ത് ശത്രുവിനെ സഹായിച്ചു എന്നതടക്കമുള്ള ഗുരുതര വകുപ്പുകള്‍ ചുമത്തിയാണ് ഇവര്‍ക്കെതിരേ കുറ്റപത്രം സമര്‍പ്പിച്ചത്.
അസര്‍ബൈജാനില്‍നിന്നുള്ള സംഘമാണ് ഇവരുമായി നിരന്തരം ബന്ധപ്പെട്ടത്. രണ്ട് വര്‍ഷത്തിനിടെ 600ഓളം തവണ ഇവര്‍ ഇറാനുമായി ബന്ധപ്പെട്ടെന്നാണ് കണ്ടെത്തല്‍. പിടിയിലായവരില്‍ രണ്ടുപേര്‍ 16- 17 വയസ് പ്രായമുള്ളവരാണ്. സൈനിക കേന്ദ്രങ്ങളുടെ ചിത്രങ്ങള്‍ അടക്കം തന്ത്രപ്രധാനമായ വിവരങ്ങള്‍ ഇവര്‍ ഇറാന് കൈമാറിയിട്ടുണ്ട്. വധശിക്ഷ വരെ ലഭിക്കാവുന്ന കുറ്റങ്ങളാണ് ഇത്. സംഭവത്തില്‍ കര്‍ശനമായ നടപടിയുണ്ടാകുമെന്ന് ഇസ്രയേല്‍ വ്യക്തമാക്കിയിട്ടുണ്ട്. അസീസ് നിസനോവ്, അലക്സാണ്ടര്‍ സെഡിക്കോവ്, വ്യാസെസ്ലാവ് ഗുഷ്ചിന്‍, യെവ്ജെനി യോഫെ, യിഗാല്‍ നിസ്സാന്‍ എന്നീ അഞ്ച് പേര്‍ക്കൊപ്പം രണ്ട് പ്രായപൂര്‍ത്തിയാകാത്തവരുമുണ്ട്.
