തിരുവനന്തപുരം: നിലവിലെ ഇന്റലിജന്‍സ് എഡിജിപി പി വിജയന് സ്വര്‍ണക്കടത്തില്‍ പങ്കുണ്ടെന്ന് എ ഡി ജി പി എം ആര്‍ അജിത് കുമാറിന്റെ മൊഴി.എഡിജിപി പി വിജയന് കരിപ്പൂരിലെ സ്വര്‍ണക്കടത്തില്‍ പങ്കുണ്ടെന്ന് മലപ്പുറം മുന്‍ എസ് പി സുജിത് ദാസ് അറിയിച്ചെന്നാണ് നേരത്തേ ക്രമസമാധാന ചുമതല ഉണ്ടായിരുന്ന എം ആര്‍ അജിത് കുമാറിന്റെ മൊഴി.
തീവ്രവാദവിരുദ്ധ സ്‌ക്വാഡിലെ ചില അംഗങ്ങള്‍ക്കും സ്വര്‍ണക്കടത്തില്‍ പങ്കുണ്ടെന്ന് സുജിത് ദാസ് അറിയിച്ചെന്ന് എ ഡി ജി പി പറയുന്നു. സര്‍ക്കാര്‍ പുറത്തുവിട്ട റിപ്പോര്‍ട്ടിലാണ് ഡി.ജി.പിക്ക് നല്‍കിയ മൊഴിയുടെ വിവരങ്ങളുള്ളത്.
സുജിത് ദാസ് തന്നോട് നേരിട്ട് ഇക്കാര്യം പറഞ്ഞെതിന് ശേഷമാണ് സ്വര്‍ണക്കടത്തിനെതിരെ കര്‍ശന നടപടിക്ക് താന്‍ നിര്‍ദേശിച്ചതെന്ന് അജിത് കുമാറിന്റെ മൊഴിയില്‍ പറയുന്നു.അതേസമയം പിവി അന്‍വര്‍ എംഎല്‍എയുടെ ആരോപണങ്ങളെല്ലാം ഡിജിപി റിപ്പോര്‍ട്ടില്‍ തള്ളിക്കളയുന്നു.
എഡിജിപി എം ആര്‍ അജിത് കുമാറിനെതിരെ നടന്ന രണ്ട് അന്വേഷണങ്ങളുടെ റിപ്പോര്‍ട്ടുകള്‍ മുഖ്യമന്ത്രി നിയമസഭയുടെ മേശപ്പുറത്ത് വച്ചിരുന്നു. അജിത് കുമാര്‍ ആര്‍എസ്എസ് നേതാക്കളെ കണ്ടെന്ന ആരോപണത്തിലും പി വി അന്‍വര്‍ ഉന്നയിച്ച ആരോപണങ്ങളിലുമുള്ള അന്വേഷണ റിപ്പോര്‍ട്ടുകളാണ് സര്‍ക്കാര്‍ ഇന്ന് പുറത്തുവിട്ടത്.
