തിരുവനന്തപുരം:സിപിഐ സംസ്ഥാന കൗണ്‍സിലില്‍ ആനി രാജയെ പരോക്ഷമായി വിമര്‍ശിച്ച് സംസ്ഥാന സെക്രട്ടറി ബിനോയ് വിശ്വം. സംസ്ഥാന നിര്‍വാഹക സമിതിയില്‍ മുതിര്‍ന്ന നേതാവ് കെ ഇ ഇസ്മായിലിനെ വിമര്‍ശിച്ച് പാലക്കാട് ജില്ലാ സെക്രട്ടറിയും രംഗത്ത് വന്നു.
ഇരു നേതാക്കളുടെയും അഭിപ്രായ പ്രകടനങ്ങളാണ് വിമര്‍ശനങ്ങള്‍ക്ക് കാരണം.ദേശീയ സെക്രട്ടറി ഡി രാജയും യോഗത്തില്‍ പങ്കെടുത്തു.
സംസ്ഥാന വിഷയങ്ങളില്‍ അഭിപ്രായം പറയുന്ന ദേശീയ നേതാക്കള്‍ സംസ്ഥാന നേതൃത്വവുമായി ആലോചിച്ച് മാത്രമേ അഭിപ്രായം പറയാവൂ എന്ന് ബിനോയ് വിശ്വം പറഞ്ഞു. ദേശീയ എക്‌സിക്യൂട്ടീവ് ഇക്കാര്യം തീരുമാനിച്ചിട്ടുണ്ടെന്നും അദ്ദേഹം ചൂണ്ടിക്കാട്ടി.
ഇതിന് പിന്നാലെയാണ് കെ ഇ ഇസ്മയിലിനെതിരെ സംസ്ഥാന നിര്‍വാഹക സമിതിയില്‍ ശക്തമായ വിമര്‍ശനം ഉയര്‍ന്നത്. പാര്‍ട്ടി ചട്ടക്കൂടില്‍ ഒതുങ്ങി കെഇ ഇസ്മയില്‍ പ്രവര്‍ത്തിക്കണമെന്ന് പാലക്കാട് ജില്ലാ സെക്രട്ടറി കെ പി സുരേഷ് രാജ് ആവശ്യപ്പെട്ടു. ഇസ്മായില്‍ വിഭാഗീയ പ്രവര്‍ത്തനം തുടങ്ങിയത് ഇപ്പോഴല്ലെന്നും സികെ ചന്ദ്രപ്പന്‍ സംസ്ഥാന സെക്രട്ടറിയായ കാലത്ത് തന്നെ തുടങ്ങിയതാണെന്നും അദ്ദേഹം പറഞ്ഞു.
