ഹങ് കാങ്ങിന് സാഹിത്യ നോബേല്‍; ആത്മാവും ശരീരവും തമ്മിലുള്ള ബന്ധം ഹങ്ങിന്റെ ഇഷ്ടപ്രമേയം

സജികുമാര്‍ കുഴിമറ്റം

ചരിത്രപരമായ നോവുകളെ കാവ്യാത്മകഗദ്യത്തിലൂടെ ആവിഷ്‌കരിച്ച് മനുഷ്യജീവിതത്തിന്റെ ദുര്‍ബലത തുറന്നുകാട്ടിയ ദക്ഷിണ കൊറിയന്‍ വനിതാ നോവലിസ്റ്റ് ഹങ് കാങ്ങിന് 2024-ലെ സാഹിത്യ നോബേല്‍. 1970 നവംബര്‍ 27ന് ദക്ഷിണകൊറിയയിലെ ഗ്വാങ്ജുവില്‍ ജനനം. ഇപ്പോള്‍ കൊറിയന്‍ തലസ്ഥാനമായ സോളില്‍ താമസം. രചനകള്‍ എല്ലാം കൊറിയന്‍ ഭാഷയില്‍.
ഹങ്ങിന്റെ  ദ് വെജിറ്റേറിയന്‍ എന്ന നോവല്‍ 2016ലെ മാന്‍ ബുക്കര്‍ ഇന്റര്‍നാഷണല്‍ പ്രൈസ് നേടിയിരുന്നു. കുടുംബത്താല്‍ അവഗണിക്കപ്പെട്ട് മനോരോഗിണിയായി പരിത്യക്തയാവുന്ന യുവതിയുടെ കഥയാണ് ദ് വെജിറ്റേറിയന്റെ ഇതിവൃത്തം. ഇംഗ്ലീഷിലേക്ക് മൊഴിമാറ്റപ്പെട്ട ഹാനിന്റെ ആദ്യനോവലാണ് ഇത്.
കൊറിയയില്‍ നിന്നു സാഹിത്യ നോബേല്‍ നേടുന്ന രണ്ടാമത്തെ വ്യക്തിയും ഏഷ്യയില്‍ നിന്ന് സാഹിത്യ നോബേല്‍ പുരസ്‌കൃതയാവുന്ന പ്രഥമ വനിതയുമാണ്.

സാഹിത്യ കുടുംബം

കൊറിയന്‍ സാഹിത്യകാരനായ ഹങ് സ്യൂങ് വോണിന്റെ മകളായ ഹങ്, യുങ്‌സായി സര്‍വ്വകലാശാലയില്‍ നിന്നു കൊറിയന്‍ സാഹിത്യത്തില്‍ ബിരുദം നേടി.  തുടര്‍ന്ന് 1998ല്‍ ലോവ സര്‍വകലാശലയില്‍ നിന്ന് ഇന്റര്‍നാഷണല്‍ റൈറ്റിങ് പ്രോഗ്രാം പഠനവും പൂര്‍ത്തീകരിച്ചു. സഹോദരന്‍ തൂംലിം(ഇംഗ്ലീഷ് ഉച്ചാരണം ഡോങ് റിം) ശ്രദ്ധേയനായ കൊറിയന്‍ എഴുത്തുകാരനാണ്.

പ്രധാന കൃതികള്‍

1995 മുതല്‍ ഹങ് എഴുത്തില്‍ സജീവമാണ്. നോവെല്ലെകളുടെ സമാഹരമായ ലവ് ഇന്‍ യുങ്‌സായി ആണ് പ്രഥമ കൃതി. 1998-ല്‍ ആദ്യ നോവലായ ബ്ലാക്ക് ഡിയര്‍ പുറത്തിറങ്ങി. 2000-ല്‍ രണ്ടാമത്തെ നോവെല്ലെ സമാഹാരമായ മൈ വുമണ്‍സ് ഫ്രൂട്‌സും 2002 ല്‍ നിങ്ങളുടെ തണുത്ത കൈകള്‍ എന്ന നോവലും എന്റെ പേര് സൂര്യകാന്തി, ചുവന്ന പൂവിന്റെ കഥ എന്നീ നോവെല്ലെകളും പ്രസിദ്ധീകരിച്ചു.
2007-ല്‍ ആണ് ഹങ്ങിന് രാജ്യാന്തര പ്രശസ്തി നേടിക്കൊടുത്ത നോവല്‍ ദ് വെജിറ്റേറിയന്‍ പുറത്തിറങ്ങിയത്. 2013ല്‍ ആദ്യ കാവ്യസമാഹാരം ഐ പുട് ദ് ഡിന്നര്‍ ഇന്‍ ദ് ഡ്രോസര്‍ പ്രകാശിതമായി. 2014-ല്‍ എ ബോയ് ഈസ് കമിങ്, 2016-ല്‍ വൈറ്റ് എന്നീ നോവലുകളും പുറത്തിറങ്ഹി. 2021-ല്‍ പ്രസിദ്ധീകൃതമായ വിടപറയരുതേ എന്ന നോവലും ഏറെ ആസ്വാദക ശ്രദ്ധ പിടിച്ചു പറ്റിയിരുന്നു.

—