തിരുവനന്തപുരം: ശബരിമല തീര്ത്ഥാടനം സുഗമമാക്കാന് തിരുവിതാംകൂര് ദേവസ്വം ബോര്ഡ് പ്രസിഡന്റ് പി.എസ്. പ്രശാന്തിന് നിവേദനം സമര്പ്പിച്ച് ശബരിമല കര്മ്മസമിതി. നിര്ദേശങ്ങള് പരിഗണിക്കുമെന്ന് ഉറപ്പ് ലഭിച്ചതായി കര്മ്മസമിതി ഭാരവാഹികള് വാര്ത്താസമ്മേളനത്തില് അറിയിച്ചു.
സ്പോട്ട് ബുക്കിങ് നിര്ത്തുമ്പോള് തമിഴ്നാട്, ആന്ധ്ര, കര്ണാടക തുടങ്ങിയ സംസ്ഥാനങ്ങളിലെ വിദൂരഗ്രാമങ്ങളില് നിന്നുള്ള ഭക്തര്ക്കുണ്ടാകുന്ന ബുദ്ധിമുട്ട് കണക്കിലെടുക്കണം. ശബരിമല ക്ഷേത്രത്തിന് ചുറ്റുമുള്ള അനധികൃത നി
ര്മാണങ്ങള് പൊളിച്ചുമാറ്റി പ്രദേശത്തിന്റെ വിസ്തൃതി വര്ധിപ്പിക്കണം.
പോലീസും തിരക്ക് നിയന്ത്രിക്കാന് സേവനപ്രവര്ത്തകരെന്ന് പറഞ്ഞ് എത്തുന്നവരും അയ്യപ്പന്മാരോട് മോശമായി പെരുമാറുന്നെന്ന പരാതികള് വ്യാപകമാണ്. മുമ്പ് ശബരിമല ഡ്യൂട്ടിക്കെത്തുന്ന പോലീസുകാര് വ്രതധാരികളായിരുന്നുവെന്ന് കര്മ്മസമിതി ചൂണ്ടിക്കാട്ടി.
ക്ഷേത്രത്തിന്റെ ചൈതന്യം നിലനിര്ത്തുന്ന രീതിയിലല്ല ശബരിമലയിലെ നിര്മാണങ്ങള്. തിരുമുറ്റത്ത് ഫ്ളൈഓവറിലെ ക്യൂ പാടില്ല. ക്ഷേത്രത്തിന് ചുറ്റും കൂടുതല് തുറസായ സ്ഥലത്തിന് കേന്ദ്രസര്ക്കാരിന്റെ അനുമതിക്കായി കൂട്ടായ പരിശ്രമം നടത്താമെന്ന നിര്ദേശം മുന്നോട്ടുവച്ചിട്ടുണ്ട്.
പതിനെട്ടാം പടിക്ക് താഴെ ഒരു മണിക്കൂര് മാത്രം ക്യൂ നില്ക്കേണ്ടി വരുന്ന തരത്തില് ക്യൂ കോംപ്ലെക്സും ടോക്കണ് സമ്പ്രദായവും ഒരുക്കണമെന്നും സമിതി അഭിപ്രായപ്പെട്ടു. നീലിമല, അപ്പാച്ചിമേട്, മരക്കൂട്ടം, ശബരിപീഠം തുടങ്ങിയ സ്ഥലങ്ങളില് കുടിവെള്ളവിതരണ കൗണ്ടറുകളുടെ എണ്ണം കൂട്ടണം. പമ്പയിലെ മാലിന്യപ്രശ്നത്തിന് പരിഹാരം കാണണമെന്നും സമിതി ആവശ്യപ്പെട്ടു. മണ്ണാറക്കുളഞ്ഞി മുതല് പമ്പയിലും നിലയ്ക്കലിലുമൊക്കെ തീര്ത്ഥാടക വാഹനങ്ങള് പിടിച്ചിടുന്നത് ഒഴിവാക്കാന് നടപടി സ്വീകരിക്കണമെന്നും സമിതി ആവശ്യപ്പെട്ടു. അമിത വൈദ്യുതി നിരക്ക് പിന്വലിക്കണം. ശബരിമലയുമായി ബന്ധപ്പെട്ട് നടത്തുന്ന ചര്ച്ചകളില് ഭക്തസംഘടനകളുടെയും ഹൈന്ദവ സംഘടനകളുടെയും പ്രതിനിധികളെ ഉള്പ്പെടുത്തണം.
വാര്ത്താസമ്മേളനത്തില് ശബരിമല അയ്യപ്പ സേവാസമാജം സംസ്ഥാന പ്രസിഡന്റ് അക്കീരമണ് കാളിദാസ ഭട്ടതിരിപ്പാട്, വിശ്വഹിന്ദു പരിഷത്ത് സംസ്ഥാന ജനറല് സെക്രട്ടറി വി.ആര്. രാജശേഖരന്, ശബരിമല കര്മ്മസമിതി ജനറല് കണ്വീനര് എസ്.ജെ.ആര്. കുമാര്, ശബരിമല അയ്യപ്പസേവ സമാജം സംസ്ഥാന ജനറല് സെക്രട്ടറി ഈറോഡ് രാജന്, ഹിന്ദു ഐക്യവേദി സംസ്ഥാന സെക്രട്ടറിമാരായ സന്ദീപ് തമ്പാനൂര്, കെ. പ്രഭാകരന്, അയ്യപ്പസേവാ സമാജം സംസ്ഥാന ജോയിന്റ് ജനറല് സെക്രട്ടറി അഡ്വ. ജയന് ചെറുവള്ളില് എന്നിവര് പങ്കെടുത്തു.
