തിരുവനന്തപുരം: സംസ്ഥാനത്ത് 2018ലെ പ്രളയത്തിന്റെയും അതിനുശേഷം നിരന്തരമായി ഉണ്ടാകുന്ന മഴയുടെയും അടിസ്ഥാനത്തില്‍ കേന്ദ്ര ജല കമ്മിഷന്‍ നടത്തിയ പഠനത്തില്‍ പ്രളയം നിയന്ത്രിക്കുന്നതിനായി സംഭരണശേഷി കൂടിയ ഡാമുകളുടെ ആവശ്യകത കണ്ടെത്തിയിട്ടുണ്ടെന്ന് മന്ത്രി റോഷി അഗസ്റ്റിന്‍ നിയമസഭയില്‍ പറഞ്ഞു.
കേന്ദ്ര ജലകമ്മിഷന്റെ 2018 കേരളത്തിലെ പ്രളയത്തെ സംബന്ധിച്ച പഠന റിപ്പോര്‍ട്ടിലെ ശിപാര്‍ശയില്‍ പ്രളയ പ്രതിരോധ ഡാമുകളുടെ നിര്‍ദേശം ലഭിച്ചിരുന്നു. ഇതിന്റെ അടിസ്ഥാനത്തില്‍ സംസ്ഥാനത്ത് കൂടുതല്‍ അണക്കെട്ടുകള്‍ നിര്‍മിക്കാനുള്ള സാധ്യതാപഠനം നടത്തിയിട്ടുണ്ട്. പഠന റിപ്പോര്‍ട്ടിലെ ശിപാര്‍ശ പ്രകാരം ഐഡിആര്‍ബിയുടെ കീഴില്‍ വരുന്ന ഹൈഡ്രോളജി ഹില്‍ഡ് സ്റ്റഡി സര്‍ക്കിള്‍ ഹൈഡ്രോളജിക്കലാണ് പഠനം നടത്തിയത്. പെരിയാര്‍, ചാലക്കുടി, ചാലിയാര്‍, അച്ചന്‍കോവില്‍, മീനച്ചില്‍ എന്നീ നദീതടങ്ങളിലാണ് പുതിയ ഡാമുകള്‍ക്കായി ഹൈഡ്രോളജിക്കല്‍ പഠനം നടത്തിയത്.
