തിരുവനന്തപുരം: നിയമസഭയില് പ്രത്യേക സീറ്റ് അനുവദിച്ചില്ലെങ്കില് തറയില് ഇരിക്കുമെന്ന് പി.വി. അന്വര് എംഎല്എ. നിയമസഭാ സമ്മേളനത്തില് ഇന്ന് പങ്കെടുക്കുന്നില്ലെന്നും സ്വതന്ത്ര ബ്ലോക്ക് തന്നെ വേണമെന്നും പിവി അന്വര് ആവശ്യപ്പെട്ടു.
നിയമസഭയില് സ്വതന്ത്ര ബ്ലോക്കായി പ്രത്യേക സീറ്റ് അനുവദിക്കുന്നതില് ഇന്ന് തീരുമാനം ഉണ്ടായില്ലെങ്കില് തുടര് നടപടി സ്വീകരിക്കും. ജീവന് ഉണ്ടെങ്കില് നാളെ നിയമസഭയില് പോകുമെന്നും അന്വര് പറഞ്ഞു. പ്രതിപക്ഷത്ത് ഇരിക്കാന് പറ്റില്ലെന്ന് സ്പീക്കറെ അറിയിച്ചിട്ടുണ്ട്. ഇനി സീറ്റ് തരാതിരിക്കാനാണ് ശ്രമമെങ്കില് തറയില് ഇരിക്കാനാണ് തീരുമാനം. തറ അത്ര മോശം സ്ഥലമല്ലെന്നും പിവി അന്വര് പറഞ്ഞു.
അതേസമയം, എം.ആര്. അജിത്കുമാറിനെ ഒളിഞ്ഞും തെളിഞ്ഞും വെളള പൂശാന് ശ്രമിച്ചത് മുഖ്യമന്ത്രിയാണന്നും പി.വി. അന്വര് ആരോപിച്ചു. അജിത്കുമാറിനെ സസ്പെന്ഡ് ചെയ്യണമെന്ന ഡിജിപിയുടെ ശുപാര്ശ നിര്ബന്ധപൂര്വം തിരുത്തിച്ചുവെന്നും അന്വര് പറഞ്ഞു. പാലക്കാടും ചേലക്കരയിലും സ്ഥാനാർത്ഥിയെ നിർത്തുന്നത് പ്രവർത്തകരുടെ ആഗ്രഹം നോക്കിയാണെന്നും പിവി അൻവർ കൂട്ടിച്ചേർത്തു.
അതേസമയം, നിയമസഭയിൽ ഇന്നലെ പ്രതിപക്ഷം നടത്തിയ കയ്യാങ്കളിയിൽ പാർലമെൻററി കാര്യമന്ത്രി എംബി രാജേഷ് പ്രമേയം അവതരിപ്പിച്ചു. പ്രതിപക്ഷം സഭാചട്ടം ലംഘിച്ചെന്നും ഐ സി ബാലകൃഷ്ണൻ, അൻവർ സാദത്ത്, മാത്യു കുഴൽനാടൻ, സജീവ് ജോസഫ് എന്നിവർ സ്പീക്കറുടെ ഡയസിൽ കയറി ഇവരെ താക്കീത് ചെയ്ത് നടപടിയെടുക്കണമെന്നും എംബി രാജേഷ് പറഞ്ഞു.
