കൊച്ചി: കിരീടം എന്ന സിനിമയിലെകീരിക്കാടന് ജോസ് എന്ന വില്ലന് കഥാപാത്രത്തിലൂടെ മലയാള സിനിമാ പ്രേക്ഷകരുടെ ഹൃദയത്തില് ഇടംനേടിയ അന്തരിച്ച നടന് മോഹന്രാജിനെ അനുസ്മരിച്ച് മോഹന്ലാല്. ഒരു കഥാപാത്രത്തിന്റെ പേരില് എക്കാലവും അറിയപ്പെടുക എന്നത് അഭിനയ സിദ്ധിയുടെ മഹാനുഗ്രഹം നേടിയ കലാകാരന് മാത്രം ലഭിക്കുന്ന സൗഭാഗ്യമാണെന്ന് മോഹന്രാജിന് പ്രണാമം അര്പ്പിച്ചുകൊണ്ട് മോഹന്ലാല് ഫേസ്ബുക്കില് കുറിച്ചു.
കഥാപാത്രത്തിന്റെ പേരില് വിളിക്കപ്പെടുകയും അറിയപ്പെടുകയും ചെയ്യുക എന്നത് അഭിനയസിദ്ധിയുടെ മഹാനുഗ്രഹം നേടിയ കലാകാരന് മാത്രം കിട്ടുന്ന സൗഭാഗ്യമാണ്. കിരീടത്തിലെ കീരിക്കാടന് ജോസ് എന്ന അനശ്വര കഥാപാത്രത്തെ അവതരിപ്പിച്ച പ്രിയപ്പെട്ട മോഹന്രാജ് നമ്മെ വിട്ടുപിരിഞ്ഞു. സേതുവിന്റെ എതിരാളിയായി തലയെടുപ്പോടെ ക്യാമറയുടെ മുന്നില് നില്ക്കുന്ന അദ്ദേഹത്തിന്റെ ഗാംഭീര്യം, ഇന്നലത്തെപ്പോലെ ഞാന് ഓര്ക്കുന്നു. വ്യക്തിജീവിതത്തില് നന്മയും സൗമ്യതയും കാത്തുസൂക്ഷിച്ച എന്റെ പ്രിയപ്പെട്ട സുഹൃത്തിന് കണ്ണീരോടെ വിട.
