തെല് അവീവ്: ഇറാനില് നിന്ന് ഇരുനൂറിലേറെ ബാലിസ്റ്റിക് മിസൈലുകള് വന്നെത്തിയതിന്റെ ആഘാതം ഇസ്രായേലിനെ വിട്ടൊഴിഞ്ഞിട്ടില്ല. പല ഘട്ടങ്ങളിലായി ചേര്ന്ന സുരക്ഷാ മന്ത്രിസഭായോഗം ഇറാന് കടുത്ത തിരിച്ചടി നല്കാന് തീരുമാനിച്ചു. എന്നാല് പ്രത്യാക്രമണത്തിന്റെ സ്വഭാവം സംബന്ധിച്ച് വ്യക്തതയിലെത്തിയില്ലെന്ന് സൈനിക ഉദ്യോഗസ്ഥരെ ഉദ്ധരിച്ച് ഇസ്രായേല് മാധ്യമങ്ങള് റിപ്പോര്ട്ട് ചെയ്തു. രണ്ടുദിവസം കഴിഞ്ഞു മാത്രമാകും ആക്രമണമെന്നാണ് സൂചന.
ഇറാന്റെ ആണവ കേന്ദ്രങ്ങള്ക്കു നേരെ ആക്രമണം നടത്തുന്നത് ഒഴിവാക്കണമെന്ന അമേരിക്കന് അഭ്യര്ഥന ഇസ്രായേല് അംഗീകരിച്ചതായാണ് വിവരം. തെഹ്റാനിലെയും മറ്റും എണ്ണ ഉല്പാദനകേന്ദ്രങ്ങളെയും സൈനിക സംവിധാനങ്ങളെയും ലക്ഷ്യമിട്ടുള്ള ആക്രമണ പദ്ധതിയാണ് ഇസ്രായേലിനു മുമ്പാകെയുള്ളത്. അമേരിക്കയും ഇസ്രായേലുമായി ഇക്കാര്യത്തില് കൂടിയാലോചന തുടരുകയാണ്.
തെക്കന് ലബനാനില് ഹിസ്ബുല്ലയും ഇസ്രായേല് സൈന്യവും നേര്ക്കുനേര് പോരാട്ടം രൂക്ഷമായി തുടരുകയാണ്. ഹിസ്ബുല്ലയുമായുള്ള ഏറ്റുമുട്ടലില് എട്ടു ഇസ്രായേല് സൈനികരാണ് ഇന്നലെ കൊല്ലപ്പെട്ടത്. മുപ്പതിലേറെ സൈനികര്ക്ക് പരിക്കേറ്റു. ദക്ഷിണ ലബനാന് പട്ടണത്തില് കടന്നുകയറാനുള്ള ഇസ്രായേല് സൈനികരുടെ ശ്രമത്തിനെതിരെ ശക്തമായി ചെറുത്തുനില്ക്കുന്നതായി ഹിസ്ബുല്ല വ്യക്തമാക്കി. ശക്തമായ പ്രതിരോധം ബോധ്യപ്പെട്ടതോടെ കൂടുതല് സൈനികരെ അടിയന്തരമായി മേഖലയില് വിന്യസിക്കാനും ഇസ്രായേല് നീക്കം തുടങ്ങി.
കരയാക്രമണം വ്യാപിപ്പിക്കുന്നതിന്റെ ഭാഗമായി കൂടുതല് ഗ്രാമങ്ങളില്നിന്ന് ആളുകളോട് ഒഴിഞ്ഞുപോകാന് ഇസ്രായേല് നിര്ദേശിച്ചു. മേഖലയില് യുദ്ധഭീതി കനത്തതോടെ ലബനാന്, ഇസ്രയേല്, ഇറാന് എന്നിവിടങ്ങളില് നിന്ന് പൗരന്മാരെ ഒഴിപ്പിക്കാനും ലോകരാജ്യങ്ങള് നീക്കം തുടങ്ങി. പല രാജ്യങ്ങളുടെയും വിമാന സര്വീസുകളും പുന:ക്രമീകരിച്ചു. യുദ്ധസാധ്യത മുന്നിര്ത്തി മേഖലയില് കൂടുതല് സൈനികരെ അമേരിക്ക അടിയന്തരമായി വിന്യസിച്ചു. മൂവായിരത്തോളം സൈനികരെയാണ് പുതുതായി വിന്യസിച്ചത്. എഫ്-15, എഫ്-16, എഫ്-22, എ-10 എന്നിവയടക്കം വന് യുദ്ധവിമാന ശേഖരം അധികമായി എത്തിക്കാനും പെന്റഗണ് തീരുമാനിച്ചു.
മേഖലാ യുദ്ധം ഒഴിവാക്കാന് നയതന്ത്ര പ്രശ്നപരിഹാരത്തിന് ഊന്നല് നല്കണമെന്ന് യു.എന് രക്ഷാസമിതി നിര്ദേശിച്ചു. എന്നാല് ഇറാന് ആക്രമണത്തെ ശക്തമായി അപലപിക്കാന് തയാറായില്ലെന്ന് ചൂണ്ടിക്കാട്ടി ഐക്യരാഷ്ട്ര സഭ സെക്രട്ടറി ജനറല് അന്റോണിയോ ഗുട്ടെറസിന് രാജ്യത്ത് പ്രവേശിക്കുന്നതിന് ഇസ്രായേല് വിലക്കേര്പ്പെടുത്തി.
