ചാങ്ഷൗ: ചൈന ഓപ്പണ് ബാഡ്മിന്റണില് ഭാരത വനിതാ സിംഗിള്സ് താരം മാളവിക ബന്സോദിന്റെ കുതിപ്പ് ക്വാര്ട്ടറില് തീര്ന്നു. രണ്ട് തവണ ലോക ബാഡ്മിന്റണ് വനിതാ സിംഗിള്സ് ജേത്രിയായ മുന് ലോക ഒന്നാം നമ്പര് താരം അകാനെ യമാഗുച്ചിയോട് പരാജയപ്പെട്ടാണ് താരത്തിന്റെ പുറത്താകല്.
ചൈന ഓപ്പണില് നാലാം സീഡ് താരമായി ഇറങ്ങിയ ജപ്പാന്കാരിക്ക് മുന്നില് നേരിട്ടുള്ള ഗെയിമിനാണ് മാളവികയുടെ പ്രയാണം അവസാനിച്ചത്. സ്കോര്: 10-21, 16-21.
നിലവില് ലോക അഞ്ചാം നമ്പര് താരമാണ് യമാഗുച്ചി. റാങ്കിങ്ങില് 43-ാം സ്ഥാനത്തുള്ള മാളവിക രണ്ട് വമ്പന് താരങ്ങളെ തോല്പ്പിച്ചാണ് ക്വാര്ട്ടര് വരെയെത്തിയത്. പാരീസ് ഒളിംപിക്സ് 2024ല് വെങ്കലം നേടിയ ഇന്തോനേഷ്യയുടെ ഗ്രിഗോറിയ മാറിസ്ക തന്ജങ്ങിനെ നേരിട്ടുള്ള ഗെയിമിന് തോല്പ്പിച്ചാണ് പ്രീക്വാര്ട്ടറില് കടന്നത്. പ്രീക്വാര്ട്ടറില് രണ്ട് തവണ കോമണ് വെല്ത്ത് ഗെയിംസ് മെഡല് നേടിയ മുന്നിര താരം സ്കോട്ട്ലന്ഡുകാരി ക്രിസ്റ്റി ഗില്മോറിനെ തോല്പ്പിച്ചാണ് ക്വാര്ട്ടറില് പ്രവേശിച്ചത്.
